बैकिङ्ग समाचार ।  
सरकारले लकडाउनलाई केही खुकुलो बनाउँदै बैंक तथा वित्तीय संस्था सञ्चालनका लागि मापदण्ड निर्धारण गरेको छ । कोरोना भाइरसको महामारीलाई रोकथाम तथा न्यूनीकरणका लागि गरिएको लकडाउनलाई केही खुकुलो बनाउँदै यस्तो कार्यक्रम ल्याएको हो ।

मन्त्रिपरिषद्को निर्णयअनुसार अब बैंक तथा वित्तीय संस्थाका कर्मचारीले लकडाउनमा २ सिफ्ट गरेर कार्यालय सञ्चालन गर्नु पर्नेे छ ।

बुधबार बसेको मन्त्रिपरिषद्को निर्णय सार्वजनिक गर्दै अर्थ, सूचना तथा सञ्चारमन्त्री डा. युवराज खतिवडाले लकडाउन अवधिमा बैंक, वित्तीय संस्था, बीमा कम्पनी, सहकारी संस्थाहरु, सार्वजनिक तथा सरकारी कर्मचारीले पूर्णकालीन समय ग्राहकलाई सेवा दिनुपर्ने बताउनुभयो ।

जसमा कर्मचारीलाई व्यवस्थापन कमिटिले बिहान ८ बजेदेखि १ बजेसम्म र १ बजेदेखि ६ बजेसम्मको सिफ्ट मिलाउनु पर्ने सरकारको निर्देशन छ ।

यसअघि बैंक तथा वित्तीय संस्था र बीमा कम्पनीहरुले बिहान ११ बजेबाट २ बजेसम्म मात्र सेवा दिँदै आएका थिए । वित्तीय सेवा अत्यावश्यक सेवाअन्तर्गत रहेको हुँदा यसलाई पुर्णकालिन रुपमा ग्राहकलाई सेवा दिने निर्णय गरिएको मन्त्री खतिवडाले बताउनुभयो ।