भरतपुरमा एलपी ग्यासको हाहाकार, खाली सिलिन्डर बोकेर घण्टौं लाइनमा उपभोक्ता

चितवन – चितवनको भरतपुर महानगरपालिकाका विभिन्न क्षेत्रमा खाना पकाउने एलपी ग्यासको अभाव भएपछि उपभोक्ताहरू समस्यामा परेका छन्। ग्यास वितरण केन्द्रहरूमा बिहानैदेखि खाली सिलिन्डर बोकेर पुगेका उपभोक्ताहरू घण्टौं लाइन बस्न बाध्य भएका छन्। केही स्थानमा एक सिलिन्डर ग्यास पाउनसमेत साता दिनसम्म कुर्नुपर्ने अवस्था रहेको उपभोक्ताहरूले बताएका छन्।

उपभोक्ताहरूका अनुसार नियमित रूपमा ग्यास आपूर्ति नहुँदा दैनिक घरायसी कामकाज प्रभावित भएको छ। वितरण केन्द्रहरूमा ग्यास आएको खबर पाएपछि लामो लाइन लाग्ने गरेको र धेरै उपभोक्ता ग्यास नपाई फर्किनुपर्ने अवस्था रहेको गुनासो छ।

ग्यासको अभावसँगै बजारमा कृत्रिम संकट सिर्जना गरिएको आशंका समेत उपभोक्ताहरूले व्यक्त गरेका छन्। सम्बन्धित निकायले आपूर्ति व्यवस्था सहज बनाउन र बजार अनुगमनलाई प्रभावकारी बनाउनुपर्ने माग उनीहरूको छ। यसैबीच, ग्यास अभावका कारण भरतपुरका विभिन्न वितरण केन्द्रमा उपभोक्ताको भीड बढेको छ भने सहज आपूर्तिको माग गर्दै सरोकारवाला निकायको ध्यानाकर्षण गराइएको छ।