बैंकिङ्ग समाचार, काठमाडौं ।
“कृषिमा आधारित उद्यमीहरूलाई नवप्रवर्तन र आर्थिक वृद्धि तर्फ थप अग्रसर गराउने उद्देश्यका साथ सञ्चालित एक्सिलेरेटर कार्यक्रमको लागि आकांक्षी उद्यमीहरूबाट आवेदन खुला गरिएको छ”

प्राइभेट इक्विटी एवम् भेन्चर क्यापिटल कोष संचालक आध्यन्त फण्ड म्यानेजमेन्ट लिमिटेड र सहज–एनएएमडीपी (नेपाल कृषि बजार विकास कार्यक्रम) को मुख्य साझेदारीमा प्रदेश १ मा उच्च वृद्धिको सम्भावना भएका कृषि उद्यमहरूलाई लक्षित गर्दै “आध्यन्त एक्सिलेरेटर कार्यक्रम” विराटनगरमा आज पत्रकार सम्मेलन गर्दै सुरुवात गरिएको छ ।

विराटनगरस्थित बिग होटलमा आयोजना गरिएको पत्रकार सम्मेलनमा उद्योग वाणिज्य महासंघ केन्द्रिय कार्यकारिणी समिति सदस्य तथा प्रदेश उपाध्यक्ष राजेन्द्र राउत, प्रदेश कृषि मन्त्रालयका उपसचिव पशुपति पोखरेल, प्रदेश लगानी प्राधिकरणका सिइओ डा. सरोज कोइराला, सहज कार्यक्रमका टिम लिड रिक भान डेर क्याम्प र आध्यन्तका संस्थापक मनोज पौडेलले मन्तव्य व्यक्त गरेका थिए ।

यससंगै कार्यक्रममा सहभागी हुनको लागि प्रदेश नं. १ का कृषि उद्यमीहरूबाट आवेदन आव्हान गरिएको छ ।

साथै प्रदेश न. १ मा लगानी प्रवर्द्धनका लागि प्रदेश लगानी प्राधिकरण, नेपाल उद्योग वाणिज्य महासंघ प्रदेश नं. १, सहज परियोजना र आध्यन्त बीच औपचारिक समझदारी गर्ने प्रक्रिया अगाडी बढेको समेत जानकारी गरिएको छ ।

यस कार्यक्रमको प्राथमिक लक्ष्य प्रदेश १ का कृषि व्यवसायहरूको क्षमता बढाई उनीहरूलाई थप लगानी प्राप्त गर्नका लागि पूँजीमा पहुँच पुर्याउन सहयोग गर्नु रहेको छ । प्रदेश १ पर्यटन, कृषि, व्यापार र उद्योगमा अग्रणी प्रदेश हो । यस प्रदेशमा उपलब्ध स्रोतहरूको समुचित उपयोग गरी समृद्ध प्रदेश बन्ने ठूलो अवसर रहेको छ । तथापि त्यसको उचित लाभ लिन सकिएको छैन । 

एक्सेलरेटर कार्यक्रमले कृषिमा आधारित उद्यमीहरूलाई आफ्नो व्यवसाय विस्तार गर्नको लागि आवश्यक स्रोत–सामाग्री र व्यवसायिक परामर्श प्रदान गरी लगानीयोग्य बन्न मद्दत गर्नेछ । जसले प्रदेशमा उपलब्ध स्रोतहरूको व्यवसायिक उपयोग गरी प्रदेशलाई समृद्ध र आत्मनिर्भर बन्न मद्दत पुग्नेछ । यस कार्यक्रमले कृषि–उद्यमीहरूलाई व्यवसायिक वृतमा तथा वृत भन्दा बाहिर रहेका उद्योगी–समुदायसँग सम्पर्क विस्तार गर्न मद्दत हुनुका साथै थप रोजगारी सिर्जना गर्न मद्दत गर्ने उद्देश्य राख्दछ ।

यसअघिका एक्सिलेरेटर कार्यक्रमहरू राजधानीमा मात्र केन्द्रित हुने गरेको गुनासोबीच आध्यन्त एक्सिलेरेटर कार्यक्रम नेपालमै पहिलो पटक राजधानी बाहिर, प्रदेश १ लाई केन्द्रित गरेर हुन लागिरहेको हो । यसबाहेक नेपालमै पहिलो पटक सार्वजनिक निजी साझेदारीको मोडलमा एक्सिलेरेटर कार्यक्रम सञ्चालन हुन गइरहेको हो । 

यसमा प्रदेश सरकारको तर्फबाट प्रदेश लगानी प्राधिकरण, निजी क्षेत्रको सबैभन्दा ठूलो र साझा संगठन नेपाल उद्योग वाणिज्य महासंघ प्रदेश नं. १ लाई समावेश गरिएको छ ।

प्राप्त आवेदानहरूबाट १० वटा उद्यमीहरुलाई छनौट गरि १२ हप्ता सम्म पूँजी, बजार पहुँच, र विविध प्राविधिक लगायतका आन्तरिक चुनौतिहरू केन्द्रित परामर्श प्रदान गरिने छ ।

यस एक्सेलरेटर कार्यक्रमले व्यवसायिक वृतमा रहेका विभिन्न सरोकारवालाहरूले एक आपसमा गर्ने अन्तरक्रिया र सहकार्यको तरिकामा परिवर्तन ल्याउने विश्वास गरिएको छ । साथै यसले उद्यमीहरूलाई उनीहरूको व्यवसायिक पर्यावरणभन्दा बाहिरको सहयोग र स्रोतहरूको साथै सम्बन्धित क्षेत्रका विशेषज्ञ र सल्लाहकारहरूको बृहत सञ्जाल सम्म पहुँच समेत प्रदान गर्नेछ । आवेदनका लागि मिति २०७९ माघ ४ गते देखि १८ गते सम्म खुला गरिएको जानकारी गराइएको छ ।

आध्यन्तका बारेमा:
आध्यन्त नेपालमा स्टार्टअप संस्कृति तथा व्यवसायिक वातावरण प्रवर्द्धनमा काम गरिरहेको प्राइभेट इक्विटी एवम् भेन्चर क्यापिटल कोष संचालक संस्था हो । आध्यन्तले उद्यमी र उद्यमहरूका लागि पूँजी परिचालनको नयाँ प्रणालीको सुरुवात गर्ने उद्देश्य राख्दछ । 

यसले लगानीलाई उद्यमीहरूको पहुँचमा ल्याएर सँगै जोखिम मोल्ने र व्यवसायको हरेक चरणमा उनीहरूलाई सहायता प्रदान गर्दै नेपालको सबैभन्दा ठूलो र प्रभावकारी कोष परिचालन प्लेटफर्म बन्ने लक्ष्य राखेको छ । यसका साथै लगानीलाई सुलभ र आकर्षक बनाएर नेपाललाई मध्यम आय भएको मुलुकमा स्तरोन्नति गर्ने तर्फ समेत आध्यन्तले काम गरिरहेको छ ।