काठमाडौं – काठमाडौं महानगरपालिकाका प्रमुख बालेन्द्र शाहले ज्ञानेन्द्र शाहलाई ७ लाख ९३ हजार रुपैयाँ जरिवाना गरेका छन् । पूर्व राजा समेत रहेका ज्ञानेन्द्र शाहको आह्वानमा शुक्रबार (चैत १५) तीनकुने क्षेत्रमा मेडिकल व्यवसायी तथा बैंकको ऋण नतिर्न आह्वान गर्ने दुर्गा प्रसाँईको नेतृत्वमा आन्दोलन भएको थियो ।

महानगर सो आन्दोलनमा सार्वजनिक सम्पत्ति, निजी सम्पत्ति र फोहोरमैला गरेको भन्दै झण्डै ८ लाख रुपैयाँ जरिवाना गरेको हो । कोटेश्वर, तीनकुने, महादेवस्थान र बालकुमारी लगायतका क्षेत्रमा फोहोर मैला गरेकोमा १÷१ लाख रुपैयाँ जरिवाना गरेको छ । यस्तै, तीनकुने लगायतका क्षेत्रका बोटविरुवामा क्षती पुर्याएको, ट्राफिक लाइटमा क्षती पुर्याएको लगायत शीर्षकमा गरी पूर्व राजा शाहको नाममा कूल ७ लाख ९३ हजार रुपैयाँ जरिवाना गरेको हो ।

आज बसेको महानगरको बैठकले यस्तो निर्णय गरेको जनाइएको छ । आज शनिबार भएकाले जरिवानाको निर्णय ज्ञानेन्द्र शाहसम्म पुगेको छैन । महानगरका अनुसार आइतबार निर्मल निवास पत्र पुग्नेछ । महानगरले काठमाडौं उपत्यकामा हुँदै आएको आन्दोलनमा आयोजकलाई जरिवाना तोक्दै आएको छ । आन्दोलनका क्रममा हुने फोहोरमैला र बोटविरुवामा पुग्ने क्षतीअनुसार जरिवाना तय गर्दै आइरहेको छ ।