कञ्चनपुर– कञ्चनपुरका संरक्षण क्षेत्रबाहिरका ताल तथा सीमसार क्षेत्रमा पाइने चराको अस्तित्व खतरामा परेको छ। अनियन्त्रित चोरी शिकारी, अवैध व्यापार, जलवायु परिवर्तनको असर, विषादी तथा कीटनाशक, रासायनिक मलको प्रयोग, जलप्रदूषण, प्लास्टिक फोहर, सिँचाइका लागि पानीको अति प्रयोग, ताल सुकाएर माछा मार्ने कार्यले चरा संरक्षणमा चुनौती थपिएको छ।
नेपाल पन्छी संरक्षण संघ (बीसीएन) का चराविद् हिरुलाल डगौराले सीमसार क्षेत्र खुम्चिँदै जाँदा चराको बासस्थानमा खलल पुगेको बताए। ‘ताल तथा सीमसार क्षेत्र अतिक्रमण हुँदा ८६ प्रतिशत चरा जोखिममा रहेको पाइएको छ,’ उनले भने, ‘चराको बासस्थानसँगै ताल तलैया तथा सीमसार क्षेत्रमा चरा मार्नका लागि विषादीको प्रयोग हुने गरेको पाइएको छ, त्यस कार्यले चराको अस्तित्व खतरामा परेको छ।’
उनका अनुसार बेलौरी नगरपालिका–६ स्थित पुरैनी तालमा सन् २०१७ मा गरिएको सर्वेक्षणमा दुई हजार २०० जलपन्छी फेला परेका थिए। त्यसको नौ वर्षपछि सन् २०२५ मा आइपुग्दा चराको संख्या घटेर ६०५ पुगेको छ। घट्दै जानुमा बासस्थान विनाश प्रमुख कारणका रूपमा रहेको छ। बीउ छर्न र उमार्न, परागसेचन गर्न, परिस्थितिकीय प्रणालीमा सहयोग गर्न, कीरा फट्यांग्रा नियन्त्रण गर्नमा चराले महत्त्वपूर्ण भूमिका खेल्ने गर्छ। योसँगै पर्यापर्यटनमा टेवा, वातावरणको शोभा बढाउने कार्यसँगै चराको धार्मिक तथा सांस्कृति महत्त्व रहेको चराविद् डगौराले बताए।
विषादी प्रयोग गरी चरा मार्ने तथा शिकार गर्ने कार्यलाई स्थानीय सरकार, प्रशासनिक निकायले नियन्त्रण गर्नुपर्ने उनको भनाइ छ। बीसीएनको सहयोगमा चरा संरक्षणका लागि समुदाय स्तरमा सचेतना फैलाउनका लागि छलफल, गोष्ठी, बैठकसँगै चरा अवलोकनका कार्यक्रम सञ्चालन हुँदै आएका छन्। ती कार्यक्रममा चरा संरक्षण गर्नका लागि सीमसार क्षेत्र जोगाउनुपर्ने कुरामा जोड दिइँदै आएको छ।
स्वस्थ्य, प्राकृतिक सिमसार क्षेत्र मानव अस्तित्वका लागि महत्त्वपूर्ण रहेको कुरा समुदायलाई सम्झाउने बुझाउने कार्य हुँदै आएको कञ्चनपुर पन्छी संरक्षण समूहका अध्यक्ष सन्देश चौधरीले बताए। ‘सिमसारसँग मानव समाजको अत्यावश्यक र आधारभूत सम्बन्ध छ,’ उनले भने, ‘ताजा पानी आपूर्ति गर्ने कार्य सँगै सीमसार क्षेत्रले पानी भण्डारण गर्दछन्, जसका कारण सीमसार क्षेत्र महत्त्वपूर्ण छ।’
एक सर्वेक्षणअनुसार विश्वका एक अर्बभन्दा बढी मानिसका लागि सिमसार क्षेत्रका माछा प्रोटिनका प्राथमिक स्रोत हुन्। सीमसार क्षेत्रमा उब्जाएको धानले वार्षिक ३।५ अर्ब मानिसलाई खान पुग्छ। सीमसार क्षेत्रको महत्त्व नबुझ्दा अतिक्रमणको चपेटामा पर्दै गएको छ। प्रवासी चराचुरुंगी र अन्य जनावर यात्राका क्रममा आराम गर्ने, खाना खाने ठाउँ वा प्रजननका लागि सिमसारमा निर्भर हुन्छन्।
रैथाने र प्रवासी चराको मुख्य बासस्थानका रूपमा रहेका सीमसार क्षेत्रलाई जोगाउनका लागि सबैको महत्त्वपूर्ण भूमिका हुने बेलौरी नगरपालिकाका उपप्रमुख जोगराम चौधरीको भनाइ छ। बीसीएनसँग सहकार्य गरी नगरपालिका क्षेत्रभित्रका सीमसार क्षेत्र संरक्षण र जलपंछी संरक्षणका लागि योजनाबद्ध रूपमा कार्यक्रम सञ्चालन गर्न इच्छुक रहेको उनको भनाइ छ।
कञ्चनपुरमा ४८० प्रजातिका चरा पाइन्छन्। जसमा संरक्षितको सूचिमा रहेका नौ प्रजातिमध्ये सेतो गरुड, कालो गरुड, खरमजुर, सानो खरमजुर सारस, राजधनेशलगायत चरा पनि यहाँ पाइन्छन्। राष्ट्रिय निकुञ्ज तथा वन्यजन्तु संरक्षण ऐन, २०२९ मा संरक्षित पन्छी सिकार गरी मारेमा वा घाइते बनाएमा १५ हजारदेखि ३० हजार रुपैयाँसम्म जरिबाना वा तीन महिनादेखि नौ महिना कैद वा दुवै सजाय हुने व्यवस्था छ। संरक्षित वन्यजन्तु मार्ने वा घाइते बनाउनेलाई १ लाखदेखि ५ लाख रुपैयाँसम्म जरिबाना वा एक वर्षदेखि १० वर्षसम्म कैदको व्यवस्था छ।
प्रतिक्रिया