बैंकिङ्ग समाचार, काठमाडौं– अर्थमन्त्रालयले आर्थिक वर्ष २०७९/८० को सुरुदेखि देखिएको अर्थतन्त्र सुधारोन्मुख रहेको बताएको छ । आर्थिक वर्ष २०७९।८० को सुरुदेखि बाह्य क्षेत्र स्थायित्व कायम गर्न लिइएका वित्त तथा मौद्रिक नीतिको अवलम्बनले गर्दा हाल बाह्य क्षेत्रमा सुधार आई शोधनान्तर स्थिति बचतमा र विदेशी विनिमय सञ्‍चिति बढ्दै गएको मन्त्रालयले बताएको छ ।

वित्त तथा मौद्रिक नीतिको समीक्षा गरी अर्थतन्त्रको पुनरुत्थानका लागि सुधारका कदमहरू चालिएको, सार्वजनिक खर्चमा मितव्ययिता कायम गर्न सरकारी कार्यसञ्‍चालन खर्चमा उल्लेख्य रूपमा कटौती गरिएको र पुँजीगत खर्च बढाउन विकास आयोजनाहरूलाई छिटो सम्पन्‍न गर्न आवश्यक सहजीकरण र प्रभावकारी अनुगमन गरिएको मन्त्रालयले जनाएको छ।

मन्त्रालयले निजी क्षेत्रको आत्मविश्‍वास बढाइ सरकार र निजी क्षेत्रबीचको सम्बन्ध सुदृढ बनाउन जोड दिएको बताएको छ। वित्तीय क्षेत्रको स्थायित्व कायम भएको र लगानीको वातावरणमा सकारात्मक सुधार आएको मन्त्रालयले एक वर्षको प्रगति विवरणमा उल्लेख गरेको छ । व्यावसायिक वातावरणको लागि सुधारका क्षेत्रहरू पहिचान गरी कार्य अघि बढाइएको दाबी मन्त्रालयले गरेकाे छ।

अर्थमन्त्रालयकाे बागडाेर ९ महिनादेखि डा प्रकाशशरण महतले सम्हालिरहेका छन् । २०७९ पुस १० गते प्रधानमन्त्री बनेका पुष्पकमल दाहाल प्रचण्डले नेकपा एमालेसँगकाे गठबन्धन टुटी कांग्रेससहितकाे गठबन्धन बनेपछिसाेही वर्ष चैत १७ गते महतलालाई अर्थमन्त्री नियुक्त गरेका थिए ।

यस्ताे छ मन्त्रालयकाे एक वर्षकाे प्रगति विवरण