बाढीपछि रसुवाका अधिकांश क्षेत्रमा विद्युत् सेवा पुनः सञ्चालन

काठमाडौं – भोटेकोशी नदीमा आएको बाढीका कारण अवरुद्ध भएको रसुवाका विभिन्न क्षेत्रमा विद्युत् सेवा पुनः सञ्चालनमा आएको छ।

नेपाल विद्युत् प्राधिकरणका अनुसार जिल्लाको कालिका र नौकुण्ड गाउँपालिकाका अधिकांश क्षेत्रमा विद्युत् आपूर्ति पुनः सुचारु भएको छ। यस्तै, गोसाइँकुण्ड गाउँपालिकाअन्तर्गत धुन्चे, भार्खु र गोसाइँकुण्ड क्षेत्रमा समेत विद्युत् सेवा सञ्चालनमा आएको प्राधिकरणले जनाएको छ।

बाढीका कारण विद्युत् संरचनामा क्षति पुगेपछि प्रतिकूल मौसम र चुनौतीपूर्ण भौगोलिक अवस्थाबीच प्राधिकरणका प्राविधिक टोलीले मर्मत तथा पुनःस्थापनाको कामलाई तीव्रता दिएका थिए। प्राविधिक टोलीको निरन्तर प्रयासपछि प्रभावित क्षेत्रमा विद्युत् आपूर्ति पुनःस्थापित भएसँगै स्थानीय बासिन्दाको दैनिक जनजीवनसमेत क्रमशः सामान्य बन्दै गएको छ।

प्राधिकरणले अझै विद्युत् सेवा प्रभावित रहेका क्षेत्रमा समेत आपूर्ति यथाशीघ्र नियमित गर्न आवश्यक जनशक्ति, उपकरण तथा स्रोतसाधन परिचालन गरी मर्मत तथा पुनःस्थापनाको काम जारी राखेको जनाएको छ।