रास्वपा सभापति रवि लामिछानेको रिट ’हेर्दाहेर्दै’मा 

काठमाडौं – सर्वोच्च अदालतले राष्ट्रिय स्वतन्त्र पार्टी (रास्वपा) का सभापति रवि लामिछानेको मुद्दा फिर्ता लिने निर्णयविरुद्धको रिटलाई  ‘हेर्दाहेर्दै’मा राखिएको छ। न्यायाधीशद्वय विनोद शर्मा र अब्दुल अजिज मुसलमानको संयुक्त इजलासले उक्त रिटलाई हेर्दाहेर्दैमा राखेको हो।

यसअघि यस रिटमा न्यायाधीशद्वय सारंगा सुवेदी र सुनिलकुमार पोखरेलको संयुक्त इजलासले यसअघि भएका निर्णय तथा अभिलेख स्पष्ट रूपमा पेस गर्न महान्यायाधिवक्ताको कार्यालयलाई निर्देशन दिएको थियो। अदालतले विशेष गरी माघ २ मा भएको संशोधित निर्णय पनि अनिवार्य रूपमा पेस गर्न आदेश दिएको  थियो। 

महान्यायाधिवक्ता सविता भण्डारी बरालले लामिछानेमाथि यसअघि लगाइएका सम्पत्ति शुद्धीकरण र सङ्गठित अपराधको मुद्दा फिर्ता लिने निर्णय गरेकी हुन्। तर, उनको निर्णयविरुद्ध युवराज पौडेल, वरिष्ठ अधिवक्ता दिनेश त्रिपाठी र अधिवक्ता आभास रेग्मीले गत माघ ४ गते रिट दायर गरेका थिए। उनीहरूले मुद्दा फिर्ता गर्न नमिल्ने जिकिर गर्दै महान्यायाधिवक्ताको निर्णय कार्यान्वयनमा रोक लगाउन माग गरेका छन्।