डलर साटी दिन्छु भन्दै कागजको बिटा थमाइ ठगी

काठमाडौं –  डलर देखाइ ठगी गर्ने एक जनालाई प्रहरीले पक्राउ गरेको छ। पक्राउ पर्नेमा सिन्धुपाल्चोकको बाह्रबिसे नगरपालिका–६ घर भएको  ५१ वर्षीय देव बहादुर तामाङ रहेका छन्। 

काठमाडौंको नागार्जुन नगरपालिका–७ रत्नराज्य स्कूल नजिकै पछाडिको जङ्गलमा डलर साटी दिन्छु भनि पटक-पटक फोन गरी बोलाई रहेको भन्ने सूचनाको आधारमा प्रहरी वृत्त स्वयम्भूबाट खटिएको प्रहरी टोलीले उनलाई पक्राउ गरेको हो। उनले पसलेहरूलाई फोन गरी डलर साटिदिने भनी प्रलोभन देखाइ डलर देखाउने र डलरकै आकारमा काटिएको कागजको बिटा दिई ठगी गर्ने गरेको प्रहरीले बताएको छ। 

तामाङलाई चन्द्रागिरी नगरपालिका– १३ पुरानो नैकाप उनलाई पक्राउ गरिएको हो। प्रहरीले उनको कोठामा  खानतलासी गर्दा अमेरिकी डलर ५० को ५ थान , अमेरिकी डलर १ को ७०७ थान र डलरकै साइजमा काटिएको कागजको बिटा ६ थान बरामद गरेको छ। उनलाई नियन्त्रणमा लिई थप अनुसन्धान भइरहेको प्रहरीले जनाएको छ।