काठमाडौं – शाखा विस्तार र कर्मचारी सङ्ख्यामा जीवन बीमा कम्पनीभन्दा निर्जीवन बीमा कम्पनी अब्बल देखिएका छन् । नेपाल बीमा प्राधिकरणको तथ्यांकअनुसार जीवन बीमा कम्पनीको तुलनामा निर्जीवन बीमा कम्पनीहरू शाखा विस्तार र कर्मचारी सङ्ख्यामा अब्बल देखिएका हुन् ।

चालू आर्थिक वर्ष २०८१/८२ को ३ महिना (साउनदेखि असोजसम्म) निर्जीवन बीमा कम्पनी शाखा बढाउन र कर्मचारी बढाउन ‘एग्रेसिभ’ देखिएका छन् । यस अवधिमा दुवै कम्पनीहरूको तथ्यांक उल्लेख्य सुधारिएको छ । यद्यपि, जीवन बीमाको तुलनामा निर्जीवन बीमा कम्पनी अब्बल देखिएको प्राधिकरणले जानकारी दिएको छ ।

अघिल्ला वर्षहरूमा आर्थिक मन्दी र मर्जरका कारण बीमा कम्पनीहरूमा शाखा बन्द प्रचलन सुरु भएको थियो । साथै, कर्मचारी सङ्ख्या पनि घट्न थालेको थियो । यसैगरी, कम्पनीहरूको व्यवसायमा समेत सुस्तता छाएको तथ्यांकले देखाएको थियो । तर, चालू आर्थिक वर्षको पहिलो त्रैमासमा आर्थिक गतिविधि बढ्न थालेसँगै बीमा क्षेत्र समेत चलायमान बनेको देखिएको छ ।

प्राधिकरणका अध्यक्ष सूर्यप्रसाद सिलवालले पटक–पटक बीमाक्षेत्रको दायरा र व्यवसाय बढाउन सहयोगी भूमिका खेल्ने बताउँदै आएका छन् । बीमा कम्पनीहरूको बजार बढ्दै गइरहेको अवस्थामा शाखा थप्ने र कर्मचारीको सङ्ख्या बढाउने क्रम बढेको छ । सानिमा जीआईसी इन्स्योरेन्सका प्रमुख कार्यकारी अधिकृत सुद्युम्न प्रसाद उपाध्याय बीमा कम्पनी दायरा बढाउन प्रयत्न गरिरहेको बताउँछन् ।

‘निर्जीवन बीमा कम्पनी व्यवसायको दायरा बढाउन तत्पर छन् । उनीहरू आक्रामक बनिरहेका छन्,’ उनले बैंकिङ्ग समाचारसँग भने, ‘बीमा क्षेत्रले परिवर्तन खोजिरहेको छ । दायरा घटे पनि बीमा क्षेत्रमा सकारात्मक परिवर्तन पनि भइरहेको छ ।’

शाखा बढाउने होडमा निर्जीवन बीमा कम्पनी

जीवन, निर्जीवन, पुर्नबीमा र लघु गरी नेपालमा ३७ वटा बीमा कम्पनी छन् । जसमा १४ वटा जीवन र १४ वटा निर्जीवन कम्पनी छन् । यस्तै, ३ वटा लघु जीवन र ४ वटा लघु निर्जीवन बीमा कम्पनीहरू सञ्चालनमा छन् भने दुई वटा पुर्नबीमा कम्पनी छन् । जसमध्ये, समीक्षा अवधिसम्म यी कम्पनीहरूका देशभर मुख्य र क्षेत्रीय तथा शाखा र उपशाखा कार्यालय गरेर २ हजार ९९८ वटा रहेका छन् ।

गत आर्थिक वर्षको यही अवधिसम्म २ हजार ८२५ वटा कार्यालय थिए । गत वर्षको तुलनामा कार्यालय सङ्ख्या ६.१२ प्रतिशतले बढेको हो । समीक्षा अवधिसम्म जीवन बीमकको कार्यालय १.८८ प्रतिशतले बढेर १ हजार ८४० पुगेको छ । गत वर्षको यही अवधिमा जीवन बीमाको कार्यालय सङ्ख्या १ हजार ८०६ वटा थियो । यसैगरी, चालु आर्थिक वर्षको ३ महिनामा निर्जीवन बीमकको कार्यालय सङ्ख्या १३.३४ प्रतिशतले बढेर १ हजार १५८ पुगेको छ । गत वर्षको यही अवधिमा कार्यालय सङ्ख्या १ हजार १९ वटा रहेको थियो ।

कर्मचारी थप्न समेत अघि छन् निर्जीवन कम्पनी
समीक्षा अवधिसम्म बीमा कम्पनीहरूमा ११ हजार ७९९ कर्मचारी कार्यरत छन् । जसमा जीवन बीमातर्फ ५ हजार ८१९ र निर्जीवन बीमकतर्फ ५ हजार ९३४ रहेका छन् । गत वर्षको यही अवधिमा बीमा कम्पनीहरूमा ११ हजार ५०८ जना कर्मचारी कार्यरत थिए । जसमा जीवन बीमकतर्फ ५ हजार ८१९ र निर्जीवन बीमकतर्फ ५ हजार ६८९ कार्यरत थिए ।

गत वर्षको तुलनामा समीक्षा अवधिसम्म जीवन बीमा कम्पनीमा कर्मचारी सङ्ख्या ०.७९ प्रतिशत र निर्जीवन बीमकमा ४.३१ प्रतिशतले बढेको छ । प्राधिकरणकारअनुसार निर्जीवन बीमा कम्पनीहरूमा धेरै कर्मचारी थपिएका छन् । जीवन बीमा कम्पनीहरूमा भने ४६ जना मात्रै थपिएका छन् । गत वर्षको ३ महिनामा जीवन बीमा कम्पनीहरूमा ५ हजार ८१९ जना कर्मचारी थिए । तर, चालु आवको सोही अवधिमा आइपुग्दा भने ५ हजार ८६५ जना पुगेका छन् ।