क्यापिटल मार्केट डिस्कोर्शको वक्तामा एनएमबी क्यापिटलका सीईओ वैद्य सहभागी हुने

काठमाडौं – नेपाल क्यापिटल मार्केट डिस्कोर्शको वक्ताका रूपमा एनएमबी क्यापिटलका प्रमुख कार्यकारी अधिकृत (सीईओ) दिपेश कुमार वैद्य सहभागी हुने भएका छन्। उनी डिस्कोर्शको तेस्रो सत्र ‘प्रविधि तथा नवप्रवर्तन: नेपालको पुँजी बजारको भविष्य’ मा वक्ताका रूपमा सहभागी हुने भएका हुन्। 

उनी २०७८ मा एनएमबी क्यापिटलको सीईओमा नियुक्त भएका हुन्। उनीसँग स्वदेश तथा विदेशको मर्चेन्ट बैंकमा २० वर्षभन्दा बढी काम गरेको अनुभव छ। वैद्यले माछापुच्छ्रे कृति क्यापिटल लिमिटेडकाे प्रमुख कार्यकारी अधिकृतको रूपमा जिम्मेवारी सम्हालिसकेका छन्। उनी सुरुमा कृति क्यापिटलका संस्थापक तथा प्रबन्ध निर्देशक थिए। कृति माछापुच्छ्रे क्यापिटलमा मर्ज भएपछि उनी सीईओ भएका थिए।

वैद्यले अमेरिकाको ब्रेन्डिज युनिभर्सिटी इन्टरनेशनल विजनेश स्कुलबाट एमबीए गरेका छन्। नेपालको पुँजी बजारबारे बृहत छलफल गर्ने लक्ष्यसहित बैंकिङ्ग समाचारको आयोजना र नासा सेक्यूरिटिजको मुख्य प्रायोजनमा नेपाल क्यापिटल मार्केट डिस्कोर्श हुन लागेको छ। पुँजी बजारको नीतिगत सुधार, नियामकीय अवस्थाको चर्चा र सुधार तथा लगानीकर्ताको हकहित र शेयर शिक्षा फैलाउने लक्ष्यसहित नेपाल क्यापिटल मार्केट डिस्कोर्श आयोजना हुन लागेको हो।

क्यापिटल मार्केट डिस्कोर्श यही वर्ष २०८३ साल भदौ २१ गते काठमाडौंको मेरियट होटलमा हुनेछ। जसमा उद्घाटन सत्रसहित ४ वटा सत्रगत छलफल हुनेछन्। डिस्कोर्शको पहिलो सत्र ‘उत्पादन, नीति तथा नियमनः नेपालको पुँजी बजारको भविष्य’, दोस्रो सत्र ‘सचेत लगानीकर्ता, सबल पुँजी बजार: सचेतना र साक्षरताको भूमिका’ तेस्रो सत्रमा ‘प्रविधि तथा नवप्रवर्तनः नेपालको पुँजी बजारको भविष्य’ नामक सत्र गत छलफल हुने छन्। 

यस्तै, डिस्कोर्शमा नेपाल धितोपत्र बोर्डका अध्यक्ष डा.गोपाल भट्टसँग विशेष डुओलग समेत हुनेछ। सत्रगत छलफलमा नियमन र नीति निर्माण, लगानीकर्तामा शेयर शिक्षा र शेयर बजारमा प्रविधि र इनोभेसनसँग सम्बन्धित हुनेछन्। डिस्कोर्शमा अर्थ मन्त्रालय, नेपाल धितोपत्र बोर्ड, नेपाल राष्ट्र बैंक, नेपाल स्टक एक्सचेन्ज, सीडीएससी एन्ड क्लियरिङ, ब्रोकर कम्पनी, मर्चेन्ट बैंक, वाणिज्य तथा विकास बैंक, क्रेडिट रेटिङ र सूचीकृत कम्पनीहरुको सहभागिता रहनेछ। यस्तै, प्रतिनिधि सभाका सदस्यहरू, सेक्युरिटी एन्ड एक्सचेन्ज बोर्ड अफ इन्डिया (सेबी) र बम्बई स्टक एक्सचेन्ज (बीएसई) लगायत अन्तर्राष्ट्रिय प्रतिनिधिहरूको समेत सहभागिता रहनेछ।