कल्याण विक्रम पाँडे माछापुच्छ्रे बैंकको डीसीईओमा नियुक्त

काडमाडौं – माछापुच्छ्रे बैंक लिमिटेडको नायब प्रमुख कार्यकारी अधिकृत (डीसीईओ) पदमा कल्याण विक्रम पाँडे नियुक्त भएका छन्। उनले साउन २९ गतेदेखि बैंकमा नायब प्रमुख कार्यकारी अधिकृतको रुपमा पदभार ग्रहण गरिसकेका छन्। 

बैंकिङ्ग क्षेत्रमा करिब २५ वर्ष भन्दा बढीको अनुभव सँगालिसकेका नवनियुक्त नायब प्रमुख कार्यकारी अधिकृत पाँडेले यसअघि ग्लोबल आइएमई बैंक, साबिकको जनता बैंक, लक्ष्मी बैंक तथा कुमारी लगायतका बैंकमा विभिन्न महत्त्वपूर्ण जिम्मेवारीमा रहेर काम गरिसकेका छन्। पाँडेले बंगलोर विश्वविद्यालयबाट वित्त विषयमा एमबीए प्रथम श्रेणीमा उत्तीर्ण गरेका छन्। साथै, अलिगढ मुस्लिम विश्वविद्यालयबाट इलेक्ट्रिकल इन्जिनियरिङमा अनर्ससहित बीटेक उपाधि हासिल गरेका छन्।

डीसीईओ पाँडेसँग योजना तथा कार्यान्वयन, कर्पोरेट तथा पूर्वाधार, एसएमई तथा रिटेल बैंकिङ्ग, व्यवसाय रूपान्तरण तथा डिजिटलाइजेसन, जोखिम व्यवस्थापन तथा अनुपालन लगायत ट्रेड फाइनान्स तथा ट्रान्जेक्सन बैंकिङ्ग क्षेत्रको गहिरो अनुभव रहेको छ। त्यसैगरी, मर्जर, एक्विजिसन तथा एकीकरण, वित्तीय विश्लेषण तथा उत्पादन विकास, दिगो तथा हरित बैंकिङ्ग लगायतका क्षेत्रमा समेत उनले महत्त्वपूर्ण अनुभव हासिल गरेका छन्। 

नेतृत्व क्षमता तथा नतिजामुखी कार्यशैलीका लागि परिचित पाँडेको नियुक्तिसँगै माछापुच्छ्रे बैंकले लामो बैंकिङ्ग अनुभव, तथा वित्तीय विशेषज्ञताबाट बैंकको व्यवसाय विस्तार, सेवा प्रवाहमा सुधार र रणनीतिक लक्ष्य प्राप्तिमा महत्त्वपूर्ण योगदान पुग्ने विश्वास लिएको छ।