साउन महिना सरकारी राजश्वमा वृद्धि : महालेखा नियन्त्रक कार्यालय

काठमाडौं – चालु आर्थिक वर्ष २०८३/८४ को पहिलो महिनामा सरकारी राजश्व सङ्कलनमा उल्लेख्य वृद्धि देखिएको छ। महालेखा नियन्त्रक कार्यालयका अनुसार गत साउन महिनामा सरकारको आम्दानी ९३ अर्ब ४३ करोड ६३ लाख रूपैयाँ हाराहारी देखिएको हो। जुन गत आर्थिक वर्षको पहिलो महिनाको कुल प्राप्तिको तुलनामा करिब १० प्रतिशत अर्थात् आठ अर्ब २४ करोड रूपैयाँले वृद्धि हो।

महालेखा नियन्त्रक कार्यालयका अनुसार कर राजश्वतर्फको कुल प्राप्ति ८५ अर्ब १९ करोड ६ लाख रूपैयाँ र गैरकर राजश्वतर्फको कुल प्राप्ति सात अर्ब तीन करोड ४७ लाख रूपैयाँ छ। त्यस्तै, सरकारले पहिलो महिना २४ करोड तीन लाख रूपैयाँ वैदेशिक अनुदान सहायता लिएको छ। चालु आर्थिक वर्षका लागि सरकारले कुल १६ खर्ब ४२ अर्ब ६ करोड ३७ लाख रूपैयाँ आम्दानी गर्ने लक्ष्य राखेको छ।

चालु आर्थिक वर्षको पहिलो महिनाको बजेट खर्च ४१ अर्ब ८८ करोड ५८ लाख रूपैयाँ रहेको महालेखा नियन्त्रक कार्यालयले जनाएको छ। चालु आर्थिक वर्षका लागि कुल रु २१ खर्ब २४ अर्ब ३४ करोड ४४ लाख रूपैयाँ बराबरको बजेट ल्याइएको थियो। साउन महिनाको बजेट खर्च वार्षिक विनियोजनको एक दशमलव ९७ प्रतिशत हो।

चालु शीर्षकमा यसवर्ष १२ खर्ब ७० अर्ब ५८ करोड ९० लाख रूपैयाँ विनियोजन भएकोमा साउन मसान्तसम्ममा एक दशमलव ६८ प्रतिशत अर्थात् २१ अर्ब ४० करोड ३८ लाख रूपैयाँ खर्च भएको छ। त्यस्तै, पुँजीगत शीर्षकमा चार खर्ब ३१ अर्ब १० लाख ६३ हजार रूपैयाँ विनियोजन भएकोमा शून्य दशमलव ३१ प्रतिशत खर्च भएको छ। वित्तीय व्यवस्थातर्फ साउन मसान्तसम्म १९ अर्ब १५ करोड ३५ लाख रूपैयाँ खर्च भएको छ। जुन यो शीर्षकमा वार्षिक विनियोजनको चार दशमलव ५३ प्रतिशत बराबर हो।