वैशाख ७ गतेदेखि दैलेखमा प्रादेशिक महोत्सव हुँदै, कर्णाली झल्कने १८० स्टल रहने

दैलेख – दैलेख प्रादेशिक महोत्सव वैशाख ७ गतेदेखि १९ गतेसम्म आयोजना हुने भएको छ। ‘कृषि, उद्यम, पर्यटन र व्यापार समृद्ध दैलेखको आधार’ भन्ने नाराका साथ आयोजना गर्न लागिएको महोत्सवको विषयमा आज काठमाडौंमा पत्रकार सम्मेलन आयोजना गरेर जानकारी दिइएको हो।

कर्णाली प्रदेशको पहाडी जिल्ला दैलेखका स्थानीय उत्पादन र त्यहाँका पर्यटकीय क्षेत्रका विषयमा जानकारी दिने उद्देश्यका साथ आयोजना गर्न लागिएको महोत्सवमा १८० स्टलहरू रहने नेपाल उद्योग वाणिज्य संघ दैलेखका पूर्व अध्यक्ष एम मल्लले जानकारी दिए।

१८० मध्ये ३० वटा स्थानीय उत्पादनका मात्रै स्टलहरू रहने र करिब ५ लाख दर्शकले अवलोकन गर्ने लक्ष्य लिइएको उनको भनाइ छ। दैलेख जिल्लाका विभिन्न कला संस्कृति झल्कने झाँकी तथा नाचहरू र स्थानीय उत्पादन र उत्पादन गर्न सक्ने सम्भावनाका क्षेत्रहरू पहिचान गरेर लगानी भित्र्याउने लक्ष्य पनि लिइएको मल्लको भनाइ छ।

संघका पूर्व अध्यक्ष शान्ति प्रसाद शर्माले दैलेखको सम्पदा, संस्कृति, परम्परा, पर्यटन, इतिहासका विषयमा जानकारी दिइने बताए। कृषि, जलविद्युत, पर्यटनका हिसाबले महत्त्वपूर्ण जिल्लाका रूपमा रहेको दैलेखको विकासका लागि सबैको सहयोग आवश्यक पर्ने उनको भनाइ छ। जिल्लामा सुन, तामा लगायतका खानी भएकाले त्यसको उत्खनन गर्न सकिएको खण्डमा जिल्लाको मुहार फेरिने उनको भनाइ छ। अर्को तर्फ पेट्रोलियम खानी भएको पुष्टि भइसकेको अवस्थामा त्यसबाट इन्धन निकालेर प्रयोग गर्ने तर्फ उचित ध्यान दिन पनि उनले सरकारलाई आग्रह गरे।

जिल्लाका उद्योगी व्यवसायीले मात्रै लगानी गरेर जिल्लाको विकास सम्भव नहुने भएकाले बाह्य लगानी भित्र्याउनका लागि पनि यो महोत्सव महत्त्वपूर्ण हुने बताए। जिल्लाको पेट्रोलियम खानी उत्खननका विषयमा अघिल्लो सरकारसँग कुरा हुँदा फागुन चैत बाट नै सुरु गर्ने भनिएको भए पनि अहिले अलपत्र परेको भन्दै यसमा पनि सरकारले ध्यान दिनु पर्ने उनको भनाइ छ। यो महोत्सवले दैलेखमा उत्पादन भएका सामानहरूको प्रचार प्रसारमा टेवा पुर्याउने उनको विश्वास छ।

दैलेखी सेवा समाजका अध्यक्ष प्रताब शाहीले जीवन, भुगोल, भाषा, संस्कृति, भेषभुषाका कारण दैलेख विना देश नै अधुरो हुने धारणा व्यक्त गरे जिल्लाको विकास गर्नका लागि सबैको हातेमालो आवश्यक रहेको उनको भनाइ छ। जिल्लाको आर्थिक विषयमा उद्योग वाणिज्य संघ बाहेक अरूलाई धेरै जानकारी नहुने भएकाले जिल्लाको आर्थिक विषयमा संघले नेतृत्व गर्नु पर्ने समाजका सचिव सूर्य बस्नेतले बताए।

पेट्रोलियम पदार्थ उत्खनन गर्न सकियो भने मात्रै पनि दैलेख जिल्ला मात्रै नभएर देशले नै काँचुली फेर्ने उनले बताए। कोटेश्वर बहुमुखी क्याम्पसका प्रोफेसर विनोद अधिकारीले महोत्सव सफलताको शुभकामना व्यक्त गर्दै पर्यटन, कला संस्कृतिको जर्गेनामा लाग्नु पर्ने धारणा व्यक्त गरे।

फोटो पत्रकार तथा मनधरी फाउण्डेसनका अध्यक्ष भरतबन्दु थापाले भाषाको उत्पत्ति भएको क्षेत्र राज्यले नै पछि पारेको भन्दै आफ्नो तर्फबाट महोत्सव सफल पार्नका लागि गर्ने सहयोग गर्न तयार रहेको बताए। त्यस्तै, राउटे उत्थान प्रतिष्ठानका अध्यक्ष सत्यदेवी खड्काले दैलेख सम्भावना बोकेको जिल्ला भएकाले सबै मिलेर जिल्लाको विकास र समृद्धिमा लाग्नु पर्ने धारणा व्यक्त गरिन्।