बैंकिङ्ग डिस्कोर्श २०२५ को सम्पूर्ण तयारी पूरा, बैंकिङ्ग समाचारबाट प्रत्यक्ष प्रसारण हुने 

काठमाडौं – तेस्रो नेशनल बैंकिङ्ग डिस्कोर्श २०२५ को सम्पूर्ण तयारी सकिएको छ । बैंकिङ्ग समाचार डटकमको आयोजनामा आगामी जेठ २२ गते अर्थात् भोलि हुने तेस्रो नेशनल बैंकिङ्ग डिस्कोर्श २०२५ को तयारी पूरा भएको हो । बैंकिङ्ग समाचारका प्रबन्ध निर्देशक राजु ढुंगेलकाअनुसार काठमाडौंको मेरियट होटलमा आयोजना हुने सो डिस्कोर्शको उद्घाटन अर्थमन्त्री विष्णु प्रसाद पौडेलले गर्नेछन् । सो कार्यक्रममा चार ओटा सत्रमा विशेष छलफल हुनेछ । 

उक्त कार्यक्रमको बैंकिङ्ग समाचारको फेसबुक पेज र युट्युब च्यानलबाट प्रत्यक्ष प्रसारण हुनेछ । निर्देशक ढुंगेलले भने, ‘हाम्रा शुभचिन्तक, सरोकारवालाहरूलाई लक्षित गरी हामीले प्रत्यक्ष प्रसारणको व्यवस्था गरेका छौँ ।’ त्यस्तै, यस डिस्कोर्शको प्रत्यक्ष प्रसारण ग्लोबल टेलिभिजन एचडिबाट पनि हुनेछ । 

उद्घाटन सत्रमा अर्थमन्त्री विष्णु पौडेल, राष्ट्र बैंक, निजी क्षेत्र र वाणिज्य तथा विकास बैंकका नेतृत्वदायी भूमिकामा रहेका व्यक्तित्वहरूको समेत उपस्थिति रहने छ । कार्यक्रममा उद्घाटन सत्रसहित चार वटा ‘प्यानल डिस्कसन’ र एउटा विशेष सत्र रहनेछ ।

‘नेपालमा कर्जा विस्तारको चुनौती: लक्षित उपायहरूको प्रयोग, क्षेत्रगत अनुकूलन र अन्य सम्भावनाहरू’ र ‘साना तथा मझौला उद्यमहरूमा कर्जा विस्तारको समस्या: समाधानका नवीन तथा प्रचलित अभ्यास र हाम्रो तयारी’ नामक पहिलो र दोस्रो सत्र छन्। यस्तै, तेस्रो सत्रमा ‘ओपन बैंकिङ्ग र फिनटेकः सहकार्य, प्रतिस्पर्धा र नेपालमा नियो–बैंकको नियामकीय अवधारणा’ र ‘मौद्रिक नीति:आर्थिक शिथिलताको चक्र तोड्न वित्त नीति र मौद्रिक नीतिको रणनीतिक साझेदारी’ नामक अन्तिम सत्र हुनेछ ।

यसबाहेक, पूर्व अर्थमन्त्री डा। प्रकाश शरण महतसँग ‘विशेष सत्र’ हुनेछ । डिस्कोर्शको मुख्य प्रायोजककारुपमा ग्लोबल आईएमई बैंक रहेको छ । यस्तै, इभेन्ट पार्टनरमा ‘इसेवा’ रहेको छ भने रेमिट्यान्स पार्टनरमा ‘माइपे रेमिट्यान्स’ र इन्टरनेट पार्टनरमा डिसहोम रहेको छ । यसैगरी, ‘सर्पोटेडबाइ’मा नबिल बैंक, एससीटी, महालक्ष्मी विकास बैंक, राष्ट्रिय वाणिज्य बैंक, कृषि विकास बैंक र इन्भेष्टमेन्ट मेगा बैंकसहित अन्य विभिन्न बैंक तथा वित्तीय संस्था र फिनटेक कम्पनीहरू समेत रहेका छन्।