एशियन लाइफको ४२% हकप्रदको जेठ १६ गते बुक क्लोज हुने

काठमाडौं – एशियन लाइफ इन्स्योरेन्स कम्पनीले हकप्रद शेयर निष्कासनका लागि बुक क्लोजको जेठ १६ गते बुक क्लोज गर्ने निर्णय गरेको छ । कम्पनीको हकप्रद शेयर बिक्री प्रबन्धकमा मुक्तिनाथ क्यापिटल रहेको छ।

कम्पनी सञ्चालक समितिको मंगलबार बसेको बैठकले जेठ १६ गते बुक क्लोज गर्ने निर्णय गरेको हो। यसको अर्थ जेठ १६ गतेभन्दा अघिसम्म कायम शेयरधनीहरुमात्रै यो कम्पनीको हकप्रद शेयर भर्न योग्य हुनेछन्।

गत वैशाख २६ गते नेपाल धितोपत्र बोर्डले एशियन लाइफलाई हाल कायम चुक्तापुँजीको १ः०.४२ अनुपातमा अर्थात ४२ प्रतिशत हकप्रद शेयर जारी गर्न अनुमति दिएको थियो। अब एशियन लाइफले आफ्ना शेयरधनीहरुलाई १ अर्ब ४२ करोड ७९ लाख ३१ हजार २४८ रुपैयाँबराबरको हकप्रद शेयर जारी गर्नेछ। जसअनुसार कम्पनीले १०० रुपैयाँ अंकित दरका कुल १ करोड ४२ लाख ७९ हजार ३१२.४८ कित्ता हकप्रद शेयर बिक्री गर्नेछ।

हाल कम्पनीको चुक्तापुँजी ३ अर्ब ३९ करोड ९८ लाख ३६ हजार ४०० रुपैयाँ रहेको छ। हकप्रद शेयर बिक्रीपछि कम्पनीको चुक्तापुँजी ४ अर्ब ८२ करोड ७७ लाख ६७ हजार ६४८ रुपैयाँ पुग्नेछ।