‘राज्यले अविवाहितको कमाइमाथि गिद्धे नजर लगाइ बढी कर लगाउँदै आएको छ’

काठमाडौं – नेपाली कांग्रेसकी सचेतक सुशिला थिङले विवाहितकोभन्दा अविवाहितको कमाइमा बढी कर लाग्ने व्यवस्थामाथि संसद्‍मा प्रश्न उठाएकी छिन् । ‘बाबु र आमाको मृत्यु भइसकेपछि अविवाहित व्यक्तिको परिवार नै हुँदैन । त्यो बेलामा राज्य अभिभावक हुनुपर्नेमा उल्टै राज्यले अविवाहितको कमाइमाथि गिद्धे नजर लगाइ अविवभाहितको कमाइमा बढी कर लगाउँदै आएको छ’, सांसद थिङले भनिन् ।

यसमा पुनरावलोकन हुनुपर्ने थिङकाे माग छ । ‘के राज्यले अविवाहितलाई कर लगाउने बाहेक अन्य कुनै करको दायरा भेटेनछन ?’ उनी थप्छिन्, ‘यदि राज्यलाई विभेद गरी कर उठाउन लाज लाग्दैन भने हामी अविवाहितबाट बढी कर उठाउँदा राज्य धनी हुन्छ भने सबै अविवाहितहरू सबै कमाइ राज्यलाई बुझाउन तयार छन् ।’

अन्यथा, राज्यले करमा विवाहित र अविवाहित भनेर करमा गरेको विभेद हटाउनुपर्ने उनको माग छ । ‘अविवाहित र विवाहित भनेर कर उठाउन पाइँदैन । यस्तो विभेदकारी कर नीति यसपालीदेखि खारेज गरियोस्’ उनले भनिन् ।