काठमाडौं – सरकारले नेपाल स्टक एक्सचेन्ज (नेप्से) को प्रमुख कार्यकारी अधिकृत (सिईओ) परिवर्तन गरेको छ । नेप्सेको सीईओमा नियुक्त हुनेमा सानिमा रिलायन्स लाइफ इन्स्योरेन्सका पूर्व डेपुटी जनरल म्यानेजर चुडामणि चापागाईं रहेका छन् । हिजो साँझ बसेको मन्त्रिपरिषद् बैठकले यो निर्णय गरेको हो।

चापागाईंले सानिमा रिलायन्स लाइफमा पाँच वर्ष काम गरेर केही समय अघि मात्रै राजिनामा दिएका थिए । चापागाईंत्यसअघि पाथिभरा विकास बैंक, सनराइज बैंक, युनियन लाइफ र सानिमा लाइफ हुँदै सानिमा रिलायन्स लाइफमा काम गरेको अनुभव छ।

नेप्सेको सीईओका लागि १० जनाको आवेदन परेकोमा पाँचजनालाई व्यावसायिक कार्ययोजना प्रस्तुतिकरण र अन्तरवार्ताका लागि छनाेट गरिएको थियो । जसमा चूडामणि चापागाईं, नारद कुमार लुइँटेल, पूर्ण प्रसाद आचार्य, बद्रीप्रसाद प्याकुरेल र हेमन्त बस्याल रहेका थिए ।

अघिल्लो मन्त्रीपरिषद् बैंठकले सर्टलिष्टमा परेका मध्येबाट नारद कुमार लुईंटेललाई सीईओमा नियुक्त गरेको थियो । तर, उनको योग्यता नै नपुगेको तथ्य खुलेपछि प्रमाणिकरण हुन नसकी सीईओ पद खारेज भएको थियो । नेप्सेको सीईओ पद माघ २५ गतेदेखि रिक्त रहेको छ ।