काठमाडौं – प्रधानमन्त्री केपी शर्मा ओलीले आज मन्त्रिपरिषद्को बैठक बोलाएका छन् । बैठक आज साँझ ५ बजे प्रधानमन्त्रीको सरकारी निवास बालुवाटारमा बस्नेछ । आजको बैठकबाट नेपाल राष्ट्र बैंकको गभर्नर नियुक्तिको लागि केही निर्णय आउन सक्ने सम्भावना रहेको बुझिएकाे छ ।

थाइल्यान्ड भ्रणकाे पूर्वसन्ध्यामा रहेका प्रधानमन्त्री ओलीले मन्त्रीपरिषद्काे बैठक बोलाएसँगै गभर्नर नियुक्तिमा केही निर्णय आउन सक्ने अनुमान गरिएकाे हाे। प्रधानमन्त्री ओली भाेलिदेखि चार दिनकाे (चैत १९ देखि २३ सम्म) थाइल्याण्डको औपचारिक भ्रमण तथा बिम्स्टेकको छैटौँ शिखर सम्मेलनमा सहभागी हुँदैछन्।

राष्ट्र बैंकका हालका गभर्नर महाप्रसाद अधिकारी यही चैत २४ देखि राष्ट्र बैंकबाट बिदा हुँदैछन् । सोही कारण आजको बैठकले गभर्नर नियुक्ति सम्बन्धी निर्णय गर्ने सम्भावना रहन्छ। तर, हालसम्म गभर्नर नियुक्तिका लागि गठित सिफारिस समितिले उम्मेदवारको नाम भने सिफारिस गरेकाे छैन । आजको मन्त्रीपरिषद्को बैठकमा सिफारिस समितिले नाम सिफारिस गरेमा १८ औँ गभर्नर चुनिने छन् । आजको बैठकले गभर्नर नियुक्ति नगरेमा भने प्रधानमन्त्रीकाे भ्रमण सकिएपछि मात्र राष्ट्र बैंकले गभर्नर पाउँनेछ ।

गत फागुन २१ गते बसेकाे मन्त्रिपरिषद् बैठकले गभर्नर नियुक्तिका लागि अर्थमन्त्री विष्णु पौडेलको संयोजकत्वमा पूर्व गभर्नर विजयनाथ भट्टराई र योजना आयोगका पूर्व उपाध्यक्ष विश्व पौडेलसहितको समिति गठन गरेको छ । सिफारिस समितिले योग्य उम्मेदवार छनोट गरी सरकारसमक्ष सिफारिस गर्नेछ। समितिको सिफारिसका आधारमा मन्त्रिपरिषद्ले नयाँ गभर्नर नियुक्त गर्ने कानुनी व्यवस्था छ।

राष्ट्र बैंकका तत्कालीन गभर्नर डा. चिरञ्जीवी नेपालको कार्यकाल सकिएको १९ दिनपछि सरकारले अधिकारीलाई गभर्नरमा नियुक्त गरेको थियो । अधिकारीको कार्यकाल सकिन लागेसँगै नयाँ गभर्नरको नियुक्तिका लागि सरकारले प्रक्रिया अघि बढाएको हो । अबको गभर्नरको रेसमा हालका डेपुटी गभर्नरहरुसँगै, राष्ट्र बैंककै हालका र पूर्व कार्यकारी निर्देशकहरू लागिरहेका छन् । त्यस्तै, अर्थविद् बैंकका सीईओ, पूर्वसीईओहरु पनि रेसमा छन् ।