काठमाडौं – नेपाल राष्ट्र बैंकले मोबाइलमार्फत वित्तीय सेवाको प्रयोग गर्दा आफ्नै नाममा दर्ता भएको सिमकार्ड र आधिकारिक एप्लिकेसन मात्र प्रयोग गर्न आग्रह गरेको छ । नेपाल राष्ट्र बैंकको वित्तीय समावेशिता तथा ग्राहक संरक्षण महाशाखाले वित्तीय चेतनाका लागि एक सन्देश जारी गर्दै यस्तो बताएको हो ।

‘बैंक तथा वित्तीय संस्थाले प्रदान गर्ने मोबाइल बैंकिङ्ग, इन्टरनेट बैंकिङ्ग र भुक्तानी प्रदायकहरूले प्रदान गर्ने मोबाइल वालेट जस्ता सेवाहरू तपाईंले दर्ता गराउनुभएको मोबाइल नम्बर वा इमेलसँग आबद्ध गरिएका हुन्छन् जसमा तपाईंको खातासम्बन्धी महत्वपूर्ण विवरणहरू जोडिएका हुन्छन् । त्यसैले कुनै पनि कारणले तपाईंको मोबाइल नम्बर वा इमेल ठेगाना परिवर्तन भएको अवस्थामा सम्बन्धित वित्तीय संस्थालाई जानकारी गराउनुपर्दछ ।’ जारी सूचनामा भनिएको छ ।

केन्द्रीय बैंकले आफ्नो मोबाइल फोन हराएको, चोरी भएको वा नम्बर परिवर्तन भएको अवस्थामा सोको जानकारी सम्बन्धित वित्तीय संस्थालाई समयमै नगराएमा खातासम्बन्धी महत्वपूर्ण विवरणमा अनधिकृत व्यक्तिको पहुँच पुग्ने जोखिम रहने पनि बताएको छ । राष्ट्र बैंकले आफ्नो मोबाइल नम्बर परिवर्तन भएमा यथाशीघ्र सम्बन्धित वित्तीय संस्थालाई जानकारी गराउन अनुरोध गरेको छ ।