काठमाडौं – एक महिनामै सेयर धितोमा प्रवाह हुने मार्जिन प्रकृतिको कर्जा ६ अर्ब ६ करोडले बढेको छ । नेपाल राष्ट्र बैंकका अनुसार असोज मसान्तसम्म बैंक तथा वित्तीय संस्थाबाट प्रवाह भएको यस्तो कर्जा १ खर्ब ५ अर्ब ८२ करोड रुपैयाँ पुगेको छ । भदौ मसान्तसम्म ९९ अर्ब ७६ करोड रुपैयाँ शेयर कर्जा प्रवाह भएको थियो ।

चालु आर्थिक वर्षको असार मसान्तयता यस्तो कर्जा १७.५ प्रतिशतले बढेको छ । असार मसान्तसम्म कुल ९० अर्ब ९ करोड रुपैयाँ सेयर कर्जा प्रवाह भएको थियो । १ करोड रुपैयाँमाथिको सेयर कर्जा सबैभन्दा धेरै छ ।

असोज मसान्तसम्म यस्तो कर्जाको रकम ६९ अर्ब ९७ करोड रुपैयाँ छ । यो वर्गको कर्जा वृद्धिदर पनि उच्च छ । असार मसान्तयता यो सीमाको कर्जा २५.१ प्रतिशत बढेको छ ।

त्यस्तै ५० लाखदेखि १ करोडसम्मको कर्जा १३ अर्ब ५९ करोड रुपैयाँ प्रवाह भएको छ । यो सीमाका कर्जा असार मसान्तयता ९.४ प्रतिशत बढेको हो ।

२५ लाखदेखि ५० लाखसम्मको कर्जा प्रवाह १४ अर्ब ८७ करोड भएको छ । असार यता यो कर्जा ३.१ प्रतिशत बढेको छ । २५ लाखमुनिको कर्जा ७ अर्ब ३९ करोड प्रवाह भएको छ । असार मसान्तयता यो कर्जा १.१ प्रतिशत बढेको राष्ट्र बैंकले जनाएको छ।