लघुवित्तका ऋणीहरूलाई राष्ट्र बैंकको राहत, निश्चित ब्याज भुक्तानी गरी कर्जा पुनर्तालिकीकरण गर्न सक्ने

काठमाडौं– नेपाल राष्ट्र बैंकले लघुवित्तका ऋणीहरूलाई सम्बोधन गर्दै परिस्थितिवश ऋण तिर्न नसकेका लघुवित्तका ग्राहकलाई निश्चित प्रतिशत ब्याज भुक्तानी गरी कर्जा पुनर्तालिकीकरण गर्न सक्ने व्यवस्था गर्ने भएको छ । केन्द्रीय बैंकले आज मौद्रिक नीति सार्वजनिक गर्दै लघुवित्त वित्तीय संस्थाहरू तथा तीनका शाखाहरूबीचको मर्जर तथा प्राप्तिलाई प्रोत्साहित गरिने पनि उल्लेख गरेको छ । 

त्यस्तै, केन्द्रीय बैंकले लघुवित्त वित्तीय संस्थाको सेवा सम्बन्धमा रहेका गुनासाको सम्बोधन गर्दै ग्राहक हित संरक्षण गर्न अन्तर्राष्ट्रिय असल अभ्यास समेतका आधारमा ग्राहक हित संरक्षणलाई प्राथमिकतामा राखी आवश्यक नियामकीय व्यवस्था गरिने र लघुवित्त संस्थाहरूले कर्जामा लिने ब्याजदर तथा सेवा शुल्कसम्बन्धी नियामकीय व्यवस्थामा समसामयिक पुनरावलोकन गरिने उल्लेख गरेको छ ।

 साथै, कुनै निश्चित प्रदेश वा क्षेत्रमा आफ्नो कार्यक्षेत्र सीमित राखी कार्य गर्ने लघुवित्त वित्तीय संस्थालाई प्रोत्साहन गर्न थप व्यवस्था मिलाइने र राष्ट्र बैंकबाट अनुमतिप्राप्त सम्पूर्ण लघुवित्त वित्तीय संस्थाहरूमा एनएफआरएस लागु गर्न आवश्यक व्यवस्था गरिने भएको छ ।