काठमाडाैं– जिल्ला प्रहरी कार्यालय उदयपुरले ‘द लाईब्रेरी क्याफे’ नामक ‘ई–लाईब्रेरी’ सहितको पुस्तकालय सञ्चालनमा ल्याएको छ। जिप्रका उदयपुरले साे पुस्तकालय त्रिभुवन विश्वविद्यालयको केन्द्रीय पुस्तकालयसँगको सहकार्यमा सञ्चालनमा ल्याएको हो । 

आइतबारबाट सञ्चालनमा आएको ‘ई–लाईब्रेरी’ मा राष्ट्रिय तथा अन्तर्राष्ट्रिय लेखकहरुको साहित्य, लेख, रचनाका साथै विभिन्न शीर्षक र विषयमा तयार गरिएका ‘रिसर्च पेपर थेसिस’ का दुई करोडभन्दा बढी ‘ई–बुक’ रहेका छन् । त्यस्तै, पुस्तकालयमा करिब तीन हजार पुस्तक राखिएको छ।

जिप्रका उदयपुरका अनुसार कार्यालय समयसम्म उक्त पुस्तकालय खुल्ला रहनेछ। ई–लाईब्रेरी मा पुस्तक पढ्न इच्छुक जाेसुकैले निःशुल्क रूपमा पुस्तक पढ्न पाउने छन्।