काठमाडौं– साताको पहिलो कारोबारको दिन आइतबार नेप्से परिसूचक उच्च अंकले बढेको छ । आज नेप्से २२.१० को अंकले बढेर २,०५३ को विन्दुमा पुगी बन्द भएको छ । अघिल्लो साताको अन्तिम कारोबारको दिन विहीबार पनि नेप्से १३.५१ अंकले उकालो लागेको थियो ।

बिहीबारको तुलनामा नेप्से १.०८ प्रतिशतले बढेका भएपनि आज कारोबार रकममा भने गिरावट देखिएको छ । त्यस दिन कारोबार रकम ३ अर्बमाथि रहेको शेयर बजारमा आज ३०४ कम्पनीको ७० लाख ४३ हजार ४५७ कित्ता खरिदबिक्री हुँदा कारोबार रकम २ अर्ब ९२ करोड २७ लाख ७१ हजार ५५८ रुपैयाँमा सीमित भएको छ ।

योसँगै आज १९४ कम्पनी नाफामा गएका छन् भने ४६ कम्पनी घाटामा देखिएका छन् । साथै ४ कम्पनीको कारोबार स्थिर छ ।