काठमाडौं– प्रमुख प्रतिपक्ष दल नेकपा (एमाले)ले गत सोमवार नयाँ बानेश्वरस्थित संघीय संसद भवनबाट प्रहरीको नियन्त्रणमा रहेका लघुवित्त पीडितहरुलाई मुद्दा नचलाउन गृहमन्त्री नारायणकाजी श्रेष्ठलाई ध्यानाकर्षण गराएको छ ।

बुधवार नेकपा (एमाले)का उपमहासचिव पृथ्वीसुब्बा गुरुङ, एमाले संसदीय दलका सचेतक महेश बर्तौला लगायत एमाले संसदीय दलको टोलीले गृहमन्त्री श्रेष्ठलाई भेट गर्दै यस्तो ध्यानाकर्षण गराएको हो । गत सोमवार लघुवित्त पीडितहरुको एक समूह संसद भवन परिसर पसेर नाराबाजी गरेसँगै प्रहरीले उनीहरुलाई नियन्त्रणमा लिएको थियो । हाल उनीहरुलाई सरकारले प्रहरी नियन्त्रणमै राखेर मुद्दा चलाउने तयारी गरेको छ ।

एमालेले लघुवित्त पीडितहरुलाई मुद्दा चलाउनु बेठिक हुने भन्दै उनीहरुलाई बिना शर्त रिहा गर्न गृहमन्त्रीलाई आग्रह गरेको छ । सञ्चारकर्मीहरुसँग कुराकानी गर्दै एमाले सचेतक महेश बर्तौलाले लघुवित्त पीडितहरु न्यायको लागि आन्दोलनरत रहेका बताए । उनीहरु सुरक्षा संयन्त्रका कमजोरीका कारण संसद भवनभित्र प्रवेश गरेकाले मुद्दा चलाउनु नहुने बर्तौलाको भनाइ छ । दोषि देखिने सुरक्षा संयन्त्रका व्यक्तिहरुलाई कारबाही गर्नुपर्ने उनले बताए । त्यस्तै संसद भवन परिसर र सिंहदरबार परिसरमा बार लगाएर निषेधित क्षेत्र तोकिएकोप्रति पनि एमालेले असन्तुष्टि व्यक्त गरेको छ । सुरक्षा संयन्त्रलाई बलियो बनाउँदै ती स्थानहरुको तारबार हटाउन पनि गृहमन्त्रीलाई आग्रह गरिएको समेतक बर्तौलाले बताए ।

उनले भने, ‘सुरक्षाको असाध्यै कमजोर उपस्थितिको कारणले गर्दा लघुवित्त ठगि पीडितहरु संसद भवन छिर्नुभयो । त्यहाँ गम्भिर सुरक्षाकर्मी भयो । गृहमन्त्रीको, गृह प्रशासनको कमजोरी रहेको कुरा हामीले महशुस गर्यौँ । आज ४०÷५० संख्याका पीडितहरुलाई प्रहरी हिरासतमा राखिएको छ । नेपाल सरकारले ती पीडितहरुलाई मुद्दा दायर गर्ने प्रक्रिया अगाडी बढाउनेगरी निर्णय गरेको छ । त्यो बेठिक छ । उहाँ पीडितहरु न्यायको लागि आउनुभएको थियो । न्यायका लागि आएका पीडितहरु संसद भवन छिर्ने बेलामा सुरक्षा संयन्त्रले रोक्नुपथ्र्यो । सुरक्षा संयन्त्रको कमजोरी हो । गृह प्रशासनको कमजोरी हो ।’

उनले थपे, ‘कमजोरी गर्ने गृह प्रशासन अनि मुद्दा खेप्नुपर्ने पीडितहरु यो हुन सक्दैन भनेर हामीले आजै गृहमन्त्रीज्युलाई ध्यानाकर्षण गरायौँ । अविलम्व उहाँहरुलाई मानवीय व्यवहारसहित बिना शर्त तत्काल उहाँहरुलाई रिहाइ गरियोस् । मुद्दा लगाउने निर्णय फिर्ता गरियोस् । दोषि देखिएका सुरक्षा संयन्त्र हो भने त्यहाँ कारबाही गरियोस् । बानेश्वर वरिपरि र सिंहदरबार आसपास पेटीमा पनि नागरिकहरु हिडडुल गर्न असहज हुनेगरी डोरी बार लगाइएको छ । यो बेठिक कुरा हो । आन्दोलन गर्न माईतीघर, बानेश्वरमा निषेधाज्ञा छ , रत्नपार्कमा असहजता छ । नागरिकले आफ्नो मुद्दा सरकारलाई सुनाउने ठाउँ कहाँ हो ? सबै ठाउँमा तारबार, डोरी घेरा लगाउने कुरा न्यायोचित छैन । राज्यले आफ्नो सुरक्षा संयन्त्र बलियो बनाओस् भन्यौँ ।’

त्यस्तै मिटरब्याज पीडितहरु हिँडेरै काठमाडौंसम्म आन्दोलनका लागि आएका भन्दै उनीहरुको माग सम्बोधन गर्ने सुनिश्चितताका साथ घर फर्काउने वातावरण बनाउन पनि माग गरिएको छ । सचेतक बर्तौलाले गृहमन्त्रीले लघुवित्त पीडितहरुलाई सहज रुपमा रिहाइ गर्न सहजीकरण गर्ने प्रतिवद्धता व्यक्त गरेको जानकारी दिए । त्यस्तै निषेधित क्षेत्र भनि तारबार गरिएको सम्बन्धमा पनि आफ्नो ध्यानाकर्षण भएको गृहमन्त्रीले बताएको उनको भनाइ छ । आफूहरुको कुरालाई सुनुवाई नभएमा यि विषयहरु आगामी संसद बैठकमा पनि उठाउने सचेतक बर्तौलाले बताए । (न्युज एजेन्सी नेपाल)