काठमाडौं– नेपाल सरकारले एक महिनामै २९ अर्ब बढी रकमको स्रोत सहमति प्रदान गरेको छ । २०८० को पुस महिलामा मात्रै २९ अर्ब २६ करोड ९८ लाख ९३ हजार बराबर बहुवर्षीय ठेक्काका लागि स्रोत सहमति र बजेटसँग सम्बन्धित अन्य सहमति दिइएको अर्थ मन्त्रालयले जनाएको छ ।

प्रदान भएको स्रोत सहमतिमध्ये रासायनिक मल खरिद गर्न मात्र १५ अर्ब १८ करोड रुपैयाँ दिइएको छ । यो कृषि तथा पशुपन्छी विकास मन्त्रालयले पाएको हो ।

सिंहदरबार ग्यालरी बैठकको रेट्रोफिटिङ र श्रीमहल भवन पुनर्निर्माण कार्यका लागि थप स्रोत सहमति दिइएको छ । जसमा क्रमशः ६० करोड र २० करोड रुपैयाँ छ । मन्त्रालयका अनुसार भौतिक पूर्वाधार तथा यातायात मन्त्रालयअन्तर्गत पुष्पलाल राजमार्ग र मदन भण्डारी राजमार्गका विभिन्न खण्डका लागि स्रोत सहमति प्रदान गरिएको छ ।