बैंकिङ्ग समाचार, काठमाडाैं– साताकाे पहिलाे काराेबार दिन सेयर बजारमा दाेहाेराे अंककाे पहिराे गएकाे छ।

आइतबार नेप्से परिसूचक २१.०३ अंक घटेर दुई हजार ८८.०७ विन्दुमा झरेको छ। दिउँसाे ११:५४ मा दुई हजार १३२.६४ काे उच्च बिन्दुमा पुगेकाे नेप्से उतारचढावका बीच दिउँसाे १:४९ मा दुई हजार १२४ काे बिन्दुमा पुगेकाे थियाे। अल्पकालीन लगानीकर्ताले नाफा सुरक्षित गर्दा त्यसयता नेप्सेमा गिरावट आएकाे देखिन्छ।

नेप्से परिसूचक घटे पनि यस दिन काराेबार रकम भने बढेकाे छ।

आज ७ अर्ब ११ करोड १७ लाख ३३ हजार रुपैयाँकाे १ करोड ८५ लाख ८९ हजार कित्ता सेयर खरिदबिक्री भएकाे छ। अघिल्लाे काराेबार दिन ६ अर्ब २७ करोडको शेयर खरिदबिक्री भएको थियाे।