सशस्त्र प्रहरी बल नेपाल र भारतीय एसएसबीबीच १०औँ द्विपक्षीय समन्वय बैठक सुरु

काठमाडौं – सीमा सुरक्षा तथा व्यवस्थापनलाई थप प्रभावकारी बनाउने उद्देश्यले सशस्त्र प्रहरी बल, नेपाल र भारतको सशस्त्र सीमा बल (एसएसबी) बीच १०औँ द्विपक्षीय समन्वय बैठक काठमाडौंमा सुरु भएको छ। कार्तिक ११ देखि १३ गतेसम्म सञ्चालन हुने बैठकमा सीमा सुरक्षा, सीमा अपराध नियन्त्रण तथा दुवै देशका सीमावर्ती सुरक्षा निकायबीच आपसी समन्वय र सहकार्य अभिवृद्धि गर्ने विषयमा छलफल हुनेछ।

नेपालको तर्फबाट बैठकमा गृह मन्त्रालय, परराष्ट्र मन्त्रालय, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान बिभाग तथा नापी बिभागका प्रतिनिधिहरुको सहभागिता रहेको प्रतिनिधिमण्डलको नेतृत्व सशस्त्र प्रहरी महानिरीक्षक नारायण दत्त पौडेलले गरेका छन्, भने भारतीय पक्षबाट गृह मन्त्रालय, विदेश मन्त्रालय, नेपालस्थित भारतीय राजदूतावास र सशस्त्र सीमा बलका उच्च पदस्थ अधिकृतहरूको सहभागिता रहेको प्रतिनिधिमण्डलको नेतृत्व सशस्त्र सीमा बल, भारतका महानिर्देशक संजय सिंघलले गरेका छन्। 

बैठकमा सीमाको प्रभावकारी सुरक्षा व्यवस्थापन, सीमा क्षेत्रमा हुने अवैध गतिविधि नियन्त्रण, मानव तस्करी तथा लागूऔषध ओसारपसार नियन्त्रण, अवैध हातहतियार तथा अन्य सामग्रीहरूको तस्करी नियन्त्रण र सीमा क्षेत्रमा शान्ति तथा सुव्यवस्था कायम गर्ने विषयमा हालसम्म भइरहेको समन्वयात्मक प्रयासहरूको समीक्षा हुनेछ।

द्विपक्षीय बैठकको क्रममा सीमा व्यवस्थापन संयन्त्रले निर्दिष्ट गरेको मार्गदर्शनको आधारमा दशगजाको अतिक्रमण हटाउने, सीमा स्तम्भहरूको संरक्षण, मर्मत सम्भार तथा निर्माण, सीमा क्षेत्रमा हुने आपराधिक गतिविधि नियन्त्रण तथा सीमापार प्रभाव पार्न सक्ने महामारी र विपद् जोखिम न्यूनीकरण गर्न नियमित समन्वय बैठक तथा तत्काल सूचना आदानप्रदानलाई प्रभावकारी बनाउने विषयमा छलफल हुनेछ। साथै सीमावर्ती क्षेत्रमा बसोबास गर्ने नागरिकसँगको सम्बन्धलाई सुदृढ बनाउन र सशस्त्र प्रहरी बल, नेपाल र सशस्त्र सीमा बल, भारतबीच आपसी सम्बन्ध तथा सहकार्य बढाउन मैत्रीपूर्ण खेलकुद लगायतका आपसी समन्वय अभिवृद्धी केन्द्रित गतिविधिहरु सञ्चालन गर्ने विषयमा समेत छलफल हुनेछ। 

बैठकमा सीमा सुरक्षालाई थप मजबुत बनाउनका लागि दुवै सङ्गठनबीच क्षमता अभिवृद्धि र संस्थागत सहयोग बढाउने, नेपाल–भारत खुला सीमानाको प्रयोग गरी हुनसक्ने तेस्रो मुलुकका नागरिकहरूको अवैध आवागमनलाई कडाइकासाथ नियमन गर्ने, सीमा व्यवस्थापनलाई थप चुस्त, प्रभावकारी र आधुनिक बनाउनका लागि उपयुक्त प्रविधिको प्रयोग गर्ने, विपद् पूर्वतयारी तथा प्रतिकार्यमा संयुक्त सहकार्यलाई प्रभावकारी बनाउने तथा सीमा नाकाहरूमा यात्रुहरूको सहजताका लागि थप सहायता कक्षहरू स्थापना गर्ने विषयमा समेत विचारविमर्श हुनेछ।

त्यसैगरी सीमा क्षेत्रमा उत्पन्न हुनसक्ने समस्या तथा चुनौतीहरूको समयमै पहिचान र समाधान गर्न नियमित सम्पर्क, आपसी विश्वास, सूचनाको प्रभावकारी आदानप्रदान र संस्थागत समन्वयलाई निरन्तरता दिने विषयमा समेत छलफल हुनेछ।द्विपक्षीय बैठकले नेपाल र भारतबीचको परम्परागत मैत्रीपूर्ण सम्बन्धलाई थप सुदृढ बनाउँदै सीमावर्ती क्षेत्रमा शान्ति, सुरक्षा र सद्भाव कायम गर्न दुवै सुरक्षा निकायबीचको समन्वय र सहकार्यलाई थप प्रभावकारी बनाउने विश्वास गरिएको छ।