तरलता व्यवस्थापन गर्न ३ महिनाको लागि ५० अर्ब तान्दै राष्ट्र बैंक

काठमाडौं – नेपाल राष्ट्र बैंकले बैंकिङ्ग क्षेत्रको तरलता व्यवस्थापन गर्न ५० अर्ब निक्षेप संकलन गर्ने भएको छ । केन्द्रीय बैंकले ९० दिनको लागि ५० अर्बको निक्षेप संकलन उपकरणको बोलकबोल तथा निष्काशन गर्ने भएको हो ।

पछिल्लो समय बैंकिङ्ग क्षेत्रमा तरलता थुप्रिने जारी छ । यसैक्रममा केन्द्रीय बैंकले तरलता व्यवस्थापन गर्न ३ महिनाको लागि ५० अर्ब खिच्ने भएको हो । यस निक्षेपको ब्याजदर बोलकबोलको माध्यमबाट निर्धारण हुनेछ भने साँवा तथा ब्याज भुक्तानी आगामी असोज २९ गते हुनेछ ।

बैंक तथा वित्तीय संस्थाले घटीमा १० करोड र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्मका लागि बोलपत्र पेस गर्न सक्नेछन् । निक्षेप संकलनको बोलकबोल ब्याजदरमा गर्नुपर्नेछ । बहुब्याजदरमा पनि बहुबोलकबोल गर्न सकिनेछ ।

निक्षेप संकलनको लागि आह्वान गरिएको रकम बाँडफाँड गर्दा बोलबमोजिम सबैभन्दा कम ब्याजदरलाई पहिलो प्राथमिकता क्रममा राखी आह्वान गरेकोरकमसम्म क्रमशः बाँडफाँड गरिने केन्द्रीय बैंकले जनाएको छ ।