तेस्रो इन्स्योरेन्स डिस्कोर्शः उद्घाटन सत्रमा नेप्सेका सीईओ चापागाईं सहभागी हुने

काठमाडौं – तेस्रो इन्स्योरेन्स डिस्कोर्श–२०२६ को उद्घाटन सत्रमा नेपाल स्टक एक्सचेञ्ज (नेप्से) का प्रमुख कार्यकारी अधिकृत (सीईओ) चुडामणी चापागाईं सहभागी हुने भएका छन्। भोलि अर्थात् माघ ७ गते बैंकिङ्ग समाचार र न्युज अफ इन्स्योरेन्सको संयुक्त आयोजनामा हुन लागेको तेस्रो नेशनल इन्स्योरेन्स डिस्कोर्शको उद्घाटन सत्रमा चापागाईं सहभागी हुने भएका हुन्।

बैंक तथा वित्तीय क्षेत्रमो लामो अनुभव संगालेका चापागाईंले लामो समय सानिमा बैंक तथा सानिमा रिलायन्स लाइफ इन्स्योरेन्समा रहेर काम गरिसकेका छन्। झापाका चापागाईंले सानिमा लाइफ इन्स्योरेन्समा महाप्रबन्धकका रुपमा काम गरिसकेका छन्।

रिलायबल नेपाल लाइफ मुख्य प्रायोजक रहेको तेस्रो इन्स्योरेन्स डिस्कोर्श यही माघ ७ गते काठमाडौंको याक एण्ड यति होटलमा हुनेछ। यस्तै, पावर्ड वाइमा फोन पे, सन् नेपाल लाइफ र सुर्यज्योति लाइफ रहेको यस कार्यक्रममा नियामकीय निकाय, बीमा कम्पनीहरु, बैंक तथा वित्तीय क्षेत्र, बीमा विज्ञ तथा अन्य क्षेत्रका व्यक्तित्वहरुको उपस्थिति रहने छ।

सो कार्यक्रममा बैंकासुरेन्सः नीति, नियामक र बजारको वास्तविकता, स्वास्थ्य सेवाको पहुँचः नेपालमा स्वास्थ्य बीमाको भविष्य, इन्सुरटेक नवप्रवर्तनः नेपालमा बीमालाई आवश्यकतासँगै जीवनशैलीमा परिणत गर्दै, भविष्यको मार्गचित्रः आधुनिक जीवनशैलीका लागि बीमा उद्योगको पुनर्संरचना र रूपान्तरण जस्ता विषयमा छलफल हुनेछ। यस्तै, विशेष सत्रमा बीमाको अर्थशास्त्र नामक छलफल हुनेछ। जसमा योजना आयोगका उपाध्यक्ष डा। प्रकाश कुमार श्रेष्ठ उपस्थित हुनेछन्।