बीमा प्राधिकरणका अध्यक्ष ओझाको रिटमा पूर्व आदेशअनुसारको कार्य सम्पन्न गरी पेस गर्न आदेश 

काठमाडौं – नेपाल बीमा प्राधिकरणका अध्यक्ष शरद ओझाको रिटमा पूर्व आदेशअनुसारको कार्य सम्पन्न गरी पेस गर्ने आदेश भएको छ। मनोजकुमार शर्मा र सुनिल कुमार पोखरेलको संयुक्त इजलासले आदेश जारी गर्दै  पूर्व आदेशअनुसारको कार्य सम्पन्न गरी पेस गर्ने भनेको हो। 

यसअघिको न्यायाधीश डा.नहकुल सुवेदी र नृपध्वज निरौलाको संयुक्त इजलासले उनको रिट हेर्न नभ्याइनेमा राखेको थियो। ओझाले सरकारद्वारा छानबिन समितिको सिफारिसको आधारमा गरिएको बर्खास्तको निर्णय र सर्वोच्च अदालतले जारी गरेको अल्पकालीन अन्तरिम आदेशको अवज्ञा गरिएको भन्दै दुई वटा रिट दर्ता गराएका थिए। 

त्यो भन्दाअघि उनको रिटमा सर्वोच्च अदालतले ‘अन्य आदेश’ जारी गरेको थियो। प्रकाशमान सिंह राउत र टेकप्रसाद ढुङ्गानाको इजलासले ओझाको मुद्दामा सुनुवाइ  गर्दै उनको अर्को मुद्दाको फाइल समेत पेस गर्न आदेश दिएको थियो। यसअघि पुस १ गते पनि ओझाको रिट हेर्न नमिल्नेमा राखिएको थियो। यस्तै, गत मंसिर २८ गते यही मुद्दामा सर्वोच्चले आदेश जारी गर्दै ओझाको पूर्व आदेशअनुसारको कार्य सम्पन्न गरी पेस गर्न भनेको थियो।