अध्यक्ष ओझाको रिटमाथि सर्वोच्चमा पेसी आज, बर्खास्ती र आदेशको अवज्ञाको रिटमा एकैपटक सुनुवाइ हुने

काठमाडौं – नेपाल बीमा प्राधिकरणका अध्यक्ष शरद ओझाले सरकार र छानबिन समितिविरुद्ध दर्ता गरिएको रिटमाथि सर्वोच्च अदालतमा आज सोमबार सुनुवाइ हुने भएको छ। उक्त सुनुवाइ न्यायाधीश डा. नहकुल सुवेदी र नृपध्वज निरौला को संयुक्त इजलासमा हुने जनाइएको छ।

ओझाले सरकारद्वारा छानबिन समितिको सिफारिसको आधारमा गरिएको बर्खास्तीको निर्णय र त्यसपछि सर्वोच्च अदालतले जारी गरेको अल्पकालीन अन्तरिम आदेशको अवज्ञा गरिएको भन्दै दुईवटा रिट दर्ता गराएका थिए। सोही रिटमाथि आज बहस सुन्ने तयारी भइरहेको छ।

सरकारले यसअघि ओझालाई पदमुक्त गरेको थियो र बीमा प्राधिकरणमा नयाँ अध्यक्ष नियुक्ति प्रक्रिया अघि बढाएको थियो। यसै प्रक्रियाअन्तर्गत पदपूर्तिका आह्वान गरिएको थियो। जसमा केही उम्मेदवारले आवेदन पनि दिएका थिए।

ओझा विगतमा नेपाली बीमा प्राधिकरणका अध्यक्ष नियुक्त भएपछि सरकारको छानबिन समितिले उनको योग्यता र कार्यसम्पादनमा प्रश्न उठाउँदै समिति गठन गरिएको थियो। समिति गठनसँगै ओझा स्वत: निलम्बनमा परेका थिए र मन्त्रिपरिषद्ले सहसचिव सेवन्तक पोखरेललाई अध्यक्ष नियुक्त गरेको थियो।

पोखरेलले पद तथा गोपनीयताको शपथ समेत लिएका थिए। तर, सर्वोच्चले ओझाको बर्खास्ती र नयाँ नियुक्ति प्रक्रियालाई स्थगित गर्दै स्थिति यथावत राख्न आदेश दिएको थियो। यसका बाबजुद ओझाले पदमा फर्कने प्रयास गरेका थिए। अर्थ मन्त्रालयले ओझालाई पदमा फर्किन नदिन निर्देशन समेत जारी गरेको थियो।

सुनुवाइपछि अदालतले सम्बन्धित दुवै पक्षको दावी र प्रमाणहरूको विस्तृत अध्ययन गर्ने र आवश्यक परे थप आदेश जारी गर्ने अपेक्षा गरिएको छ।