नेप्सेमा दोहोरो अंकको गिरावट आउँदा समेत कारोबार रकम भने बढ्यो

काठमाडौं – आज साताको अन्तिम कारोबारको दिन बुधबार शेयर बजार दोहोरो अंकले घटेर बन्द भएको छ। आज नेपाल स्टक एक्सचेन्ज (नेप्से) मा १०.६६ अंकको गिरावट देखिएसँगै बजार २६ सय १५ दशमलव ३ को बिन्दुमा बन्द भएको हो। आज ३२९ कम्पनीले ४ अर्ब ५७ करोड ७८ लाख रुपैयाँको शेयर कारोबार गर्दा १ करोड १२ लाख ९१ हजार कित्ता शेयर किनबेच भएको छ।  

आज ६३ कम्पनीको शेयर मूल्य बढेको छ भने १९४ कम्पनीको शेयर मूल्य घटेसँगै २ कम्पनीको शेयर मूल्य स्थिर देखिएको छ। आज बाराही हाइड्रोपावर पब्लिकको सबैभन्दा बढी शेयर कारोबार भएको छ । यस कम्पनीको २४ करोड ७२ लाख रुपैयाँ बराबरको शेयर कारोबार भएको छ। त्यस्तै, राधि विद्युत कम्पनीको १८ करोड ३५ लाख रुपैयाँ बराबरको शेयर कारोबार भएको छ। 

आज सबैभन्दा बढी स्वस्तिक लघुवित्त वित्तीय संस्था र एसवाई प्यानल नेपालका लगानीकर्ताले कमाएका छन्। आज यी दुई कम्पनीका लगानीकर्ताले १० प्रतिशतका दरले कमाएका हुन्। त्यस्तै, बाराही हाइड्रोपावर पब्लिकका लगानीकर्ताले आज सबैभन्दा बढी गुमाएका छन्। यस कम्पनीका लगानीकर्ताले आज ४.७६ प्रतिशतका दरले गुमाएका हुन्।