३.१ प्रतिशत बढ्दै ७४ खर्ब ८६ अर्ब नाघ्यो बैंक तथा वित्तीय संस्थाहरुमा निक्षेप

काठमाडौं – चालू आर्थिक वर्ष २०८२/८३को पहिलो ४ महिनामा बैंक तथा वित्तीय संस्थाले संकलन गर्ने निक्षेप ३.१ प्रतिशतले बढेको छ। नेपाल राष्ट्र बैंकले सार्वजनिक गरेको चालु आर्थिक वर्षको (साउनदेखि कार्तिकसम्म) को विवरणअनुसार गत आर्थिक वर्ष २०८१/८२ को सोही अवधिको तुलनामा निक्षेप बढेको हो।

हाल नेपालका बैंक तथा वित्तीय संस्थाहरुमा ७४ खर्ब ८६ अर्ब २५ करोड रुपैयाँ निक्षेप पुगेको छ। गत आर्थिक वर्षको साउनदेखि कार्तिकसम्म १ खर्ब ४९ अर्ब ८४ करोड रुपैयाँले निक्षेप बढेको थियो। २०८२ कात्तिक मसान्तमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दती निक्षेपको अंश क्रमशः ६.० प्रतिशत, ३९.२ प्रतिशत र ४५.६ प्रतिशत रहेको छ।

अघिल्लो वर्षको सोही अवधिमा यस्तो अंश क्रमशः ५.३ प्रतिशत, ३२.८ प्रतिशत र ५४.५ प्रतिशत रहेको थियो।२०८२ कात्तिक मसान्तमा बैंक तथा वित्तीय संस्थाहरूको कुल निक्षेपमा संस्थागत निक्षेपको अंश ३५.५ प्रतिशत रहेको छ। २०८१ कात्तिक मसान्तमा यस्तो निक्षेपको अंश ३५.८ प्रतिशत रहेको थियो।