भदौ १५ गतेदेखि एचएलआई लार्ज क्याप फण्ड निष्कासन गर्दै हिमालयन इन्भेष्टमेन्ट बैंकर

काठमाडौं –  हिमालयन इन्भेष्टमेन्ट बैंकर लिमिटेडले भदौ १५ गतेदेखि ‘एचएलआई लार्ज क्याप फण्ड’ निष्कासन तथा बिक्री खुला गर्ने भएको छ । हिमालयन लाइफ इन्स्योरेन्सको सहायक कम्पनी हिमालयन इन्भेष्टमेन्ट बैंकर लिमिटेडले आफ्नो पहिलो बन्दमुखि योजना एचएलआई लार्ज क्याप फण्ड निष्काशनमा ल्याउने भएको हो । 

कम्पनीले प्रति इकाइ १० रुपियाँ अंकित दरमा ४ अर्ब रुपैयाँ बराबरको ४० करोड इकाइमध्ये बीज पुँजीबापत ५० प्रतिशत अर्थात् २ अर्ब रुपियाँ बराबरको २० लाख इकाइ कोष प्रवर्द्धक हिमालयन लाइफ इन्स्योरेन्सलाई सुरक्षित गरी बाँकी न्यूनतम २ अर्ब रुपैयाँ बराबरको २० करोड इकाइ सर्वसाधारणका लागि निष्काशनमा ल्याउन लागेको हो ।

लगानीकर्ताले यस योजनाको इकाइ खरिदका लागि भदौ १८ गतेसम्म आवेदन दिन सक्नेछन् । तोकिएको समयभित्र पर्याप्त आवेदन नपरेको खण्डमा भदौ २९ गतेसम्म म्याद थप हुनेछ । 

सो फन्डमा आवेदन दिदा न्यूनतम १०० इकाइ र अधिकतम चार करोड इकाइ सम्मका लागि आवेदन दिन सकिनेछ । तर, न्यूनतम इकाइ बिक्री नभएमा योजना खारेज गरी १५ दिनभित्र आवेदकहरुको रकम फिर्ता गरिनेछ । इकाइ बाँडफाँटको मितिले १० वर्ष अवधि रहेको यस योजनाको धितोपत्र निष्कासन तथा बिक्री प्रबन्धक भने हिमालयन इन्भेष्टमेन्ट बैंकर लिमिटेड रहेको कम्पनीले जनाएको छ ।