बैंकहरुले महिलालाई प्रोत्साहन गर्ने गरी कर्जा नीति ल्याउनुपर्छः विश्लेषक अधिकारी

काठमाडौं– जनसंख्या विश्लेषक एवं पत्रकार चेतन अधिकारीले नेपालमा पुरुषको भन्दा महिलाको जनसंख्या धेरै भएकोले उद्यमशीलतामा पनि महिलालाई प्रोत्साहन गर्नुपर्ने  बताएका छन् ।

अधिकारीले कुल जनसंख्याको करिब ५२ प्रतिशत महिला भएको देशमा महिलालाई नै प्रोत्साहन गर्ने गरी राज्य,राष्ट्र बैंक र बैंकहरुले कर्जा नीति ल्याउनुपर्ने बताए । उनले नेपालको बदलिँदो जनसंख्याको संरचना अनुसार ऋण प्रवाह पनि त्यतैतर्फ मोड्नु पर्ने बताए ।

नेपालको जनसंख्याको उमेर संरचनाको पिरामिड र बैंकका ऋणीहरूको पिरामिड बनाएर हेरेमा जनसंख्या कस्तो अवस्थामा छ, ऋण प्रवाह कस्तो अवस्थामा छ भन्ने थाहा हुने उनले बताए । 

वैदेशिक रोजगारीमा २५ देखि ४० वर्ष उमेर समूहका युवाहरूको बाहुल्यता भएकोले त्यस्तो समूहलाई लक्षित गरेर साना तथा मझौला कर्जाका प्याकेज ल्याउनु पर्ने उनको भनाइ छ । वैदेशिक रोजगारीलाई न्यून गर्न, उद्यमशीलतामा प्रोत्साहन गर्न बिना धितो ऋण प्रवाहलाई पनि प्राथमिकतामा राख्न उनले सुझाव दिएका छन् ।

बैंकहरुले साना उद्यमीलाई प्राथमिकतामा नराख्ने ठुला ऋणीको पछि लाग्ने हुँदा साना उद्यमीहरू व्यवसाय गर्ने अवसरबाट वञ्चित भएको उनले बताए । नेपालमा तथ्यांकको वेवास्ता गरेर योजना बनाउने प्रचलन भएकाले राम्रो लक्ष्य राखेर बनाइएको योजना पनि असफल हुने गरेको उनको भनाइ छ।