बैंकहरुको मुद्दति निक्षेपमा ३ अर्ब ४३ करोड बढी लगानी गर्दै राष्ट्र बैंक

काठमाडौं – नेपाल राष्ट्र बैंकले बैंकहरुको मुद्दति निक्षेपमा करिब साढे ३ अर्ब रुपैयाँ लगानी गर्ने भएको छ। केन्द्रीय बैंकले विभिन्न कोषमा रहेको ३ अर्ब ४३ करोड ७५ लाख रुपैयाँ बैंकहरुको मुद्दति निक्षेपमा लगानी गर्ने भएको हो। यसका लागि मंसिर १२ गते राति १२ बजेसम्म ब्याजदर प्रस्ताव गर्न केन्द्रीय बैंकले बैंकहरुलाई आह्वान गरेको छ।

कुल रकममध्ये राष्ट्र बैंकले वाणिज्य बैंकमा २ अर्ब ७५ करोड १ लाख रुपैयाँ, राष्ट्रियस्तरका विकास बैंकमा ५१ करोड ५६ लाख रुपैयाँ र राष्ट्रियस्तरका वित्त कम्पनीमा १७ करोड १८ लाख रुपैयाँ मुद्दति निक्षेपका रुपमा लगानी गर्नेछ।

यो लगानी सन् २०२५ डिसेम्बर १७ देखि २०२६ डिसेम्बर १७ सम्म ३६६ दिनका लागि हुने केन्द्रीय बैंकले जनाएको छ।

बैंक तथा वित्तीय संस्था सञ्चालनमा आएको कम्तिमा २ वर्ष पुरा गरेको, न्युनतम पुँजीकोष कायम भएको, निष्कृय कर्जा सापटीको ५ प्रतिशत भन्दा कम भएको, तरल सम्पति खुद निक्षेपमा कम्तिमा २० प्रतिशत वा सो भन्दा बढी भएको, रियल स्टेट कर्जा तोकिएको भन्दा कम नभएको, अघिल्लो आर्थिक वर्षको सञ्चालन मुनाफामा रहेको, सर्वसाधारणका लागि छुट्याइएको शेयर जारी भएको लगायतका सर्त पुरा गरेको हुनुपर्ने केन्द्रीय बैंकले जनाएको छ।