काठमाडाैं – क्रिप्टोकरेन्सीमा कारोबारमा संलग्न ११ भारतीय काठमाडौंबाट पक्राउ परेका छन् । पक्राउ पर्नेमा बूढानीलकण्ठ नगरपालिका-३, देउला टोलमा घर भाडामा लिएर अनलाइन जुवा खेल्ने तथा खेलाउने कार्यमा संलग्न ११ जना रहेका छन् ।

प्रहरीको विशेष सूचनाका आधारमा गरिएको अपरेशनमा उनीहरूलाई नियन्त्रणमा लिइएको जिल्ला प्रहरी परिसर काठमाडौंले जनाएको छ।

प्रारम्भिक अनुसन्धानका क्रममा २ अर्ब रुपैयाँभन्दा बढीको अनलाइन सट्टाबाजी तथा ९६ लाख ३३ हजार रुपैयाँ बराबरको क्रिप्टोकरेन्सी कारोबार गरेको प्रमाण फेला परेको प्रहरीले जनाएको छ।

उनीहरुविरुद्ध काठमाडौं जिल्ला अदालतबाट सात दिनको म्याद थप गरेर थप अनुसन्धान भइरहेको छ ।