स्याङ्जा – स्याङ्जाको भिरकोट नगरपालिका–१ भलुवाडाँडामा गएराति आगलागी भएको छ । जिल्ला प्रहरी कार्यालयका सूचना अधिकारी उमेशलाल श्रेष्ठले भलुवाडाँडा बस्ने ८१ वर्षीय बेलनारायण श्रेष्ठको ढुङ्गा तथा माटोले बनेको कच्ची घर र गोठमा क्षति पुगेको बताए ।

सूचना अधिकारी श्रेष्ठले विद्युत् सर्ट भई आगलागी भएको जानकारी दिए । श्रेष्ठको एकतले कच्ची गोठबाट सुरु भएको आगोले निजकै कच्ची दुईतले घर र गोठमा क्षति पुगेको छ । प्रहरी र स्थानीयले झण्डै एक घण्टापछि आगो नियन्त्रणमा लिएका थिए ।

सूचना अधिकारी श्रेष्ठले रातिको समयमा अकस्मात घर जल्दा भित्रै रहेको एक लाख ३० हजार नगद, सात तोला सुन, भाँडावर्तन, लत्ताकपडा गरी १५ लाख रुपैयाँ बराबरको क्षति भएको बताए । आगलागीबाट दुईतले कच्ची घर र गोठ जलेर पूर्ण रुपमा नष्ट भएको छ ।