बैंकिङ समाचार, काठमाडौं
कुनै पनि बैंक तथा वित्तीय संस्थाहरूमा खराब कर्जाको अनुपात पाँच प्रतिशतभन्दा कम हुनुपर्ने नेपाल राष्ट्र बैंकको प्रावधान छ । पाँच प्रतिशतभन्दा बढी कर्जा खराब भए त्यस्तो संस्थाले राष्ट्र बैंकले खराब कर्जालाई तोकिएको सीमाभित्र नल्याउँदासम्म निक्षेप तथा कर्जा प्रवाहमा न्यूनतम सीमा तोकिदिने, शाखा विस्तार, नयाँ कर्मचारी भर्ना र सेवा–सुविधा थपलगायतमा तत्कालका लागि रोक लगाउने संस्थागत सुशासनसम्बन्धी कारबाही गर्ने व्यवस्था छ ।

खराब कर्जा बढ्नु कुनै पनि बैंक तथा वित्तीय संस्थाको स्वास्थ्यका लागि राम्रो होइन । बैंक तथा वित्तीय संस्थामा खराब कर्जा बढ्दा बचतकर्ता ग्राहकको उक्त संस्थाप्रतिको विश्वासमा कमी आउँछ ।
अहिले फाइनान्स कम्पनीमा खराब कर्जाको मात्रा निकै उच्च देखिएको छ । फाइनान्स कम्पनीहरूको चालू आर्थिक वर्षको पहिलो त्रैमासिक अपरिस्कृत वित्तीय विवरणअनुसार झन्डै तीनदेखि १८ प्रतिशत हाराहारी खराब कर्जा देखिएको छ ।

कुल ८ लाख २ हजार ३ सय ३७ वटा निक्षेप खातामार्फत १ खर्ब १२ अर्ब ५४ करोड ९० लाख निक्षेप संकलन गरी ४१ हजार ९ सय १९ वटा कर्जा खातामार्फत ९२ अर्ब १४ करोड १० लाख रुपैयाँ कर्जा प्रवाह गरेका फाइनान्स कम्पनीमा झन्डै १८ प्रतिशत कर्जा खराब हुनु सामान्य कुरा होइन । यसले फाइनान्स कम्पनीहरू थप जोखिममा छन् भन्ने देखाउँछ ।

हाल आधा दर्जन फाइनान्सको खराब कर्जा राष्ट्र बैंकले तोकिदिएको न्यूनतम सीमाभन्दा निकै माथि रहेको छ । चालू आवको पहिलो त्रैमासमा जानकी फाइनान्समा १७ दशमलव ६०, प्र्रोग्रेसिभमा १२ दशमलव ४५, नेपाल फाइनान्समा ११ दशमलव ७५, गोर्खाजमा ९ दशमलव ८९, सेन्ट्रलमा सात दशमलव ५३ र बेस्ट फाइनान्समा पाँच दशमलव ४९ प्रतिशत कर्जा खराब रहेको छ ।

गत आवको सोही अवधिमा यी फाइनान्समा क्रमशः १० दशमलव शून्य दुई, चार दशमलव २२, ४१ दशमलव ११, सात दशमलव ४२, दुई दशमलव ५६ र चार दशमलव ४० प्रतिशत कर्जा खराब रहेको थियो ।
चालू आवको पहिलो त्रैमासमा रिलायन्स, गुह्ेश्वरी मर्चेन्ट एन्ड बैंकिङ, समृद्धि, पोखरा र गुडविल फाइनान्समा क्रमशः चार दशमलव ९६, चार दशमलव ८२, चार दशमलव ७९, चार दशमलव १३ र तीन दशमलव ९७ प्रतिशत कर्जा खराब रहेको छ ।

गत आवको सोही अवधिमा यी फाइनान्समा यस्तो कर्जाको अनुपात क्रमशः तीन दशमलव ६७, दुई दशमलव ८१, ६ दशमलव शून्य एक, दुई दशमलव ६५ र दुई दशमलव १५ प्रतिशत कर्जा खराब रहेको थियो ।

यसैगरी आईसीएफसी, मञ्जुश्री र श्री इन्भेष्टमेन्ट एन्ड फाइनान्स कम्पनीमा पनि चालू आवको पहिलो त्रैमासमा क्रमशः तीन दशमलव २३, दुई दशमलव ८५ र एक दशमलव २० प्रतिशत कर्जा खराब देखिएको छ । गत आवको सोही अवधिमा यी फाइनान्स कम्पनीमा यस्तो कर्जा अनुपात एक दशमलव ३१, दुई दशमलव ४४ र एक दशमलव ४२ प्रतिशत रहेको थियो ।